खगराजले आइतबार विश्वासको मत लिने, एमालेका कारण सोडारी अन्योलमा

२१ वैशाख, काठमाडौं । बहुमतको विवादमा परेको गण्डकी प्रदेशका मुख्यमन्त्री खगराज अधिकारीले आइतबार विश्वासको मत लिने भएका छन् । उता, आजका लागि विश्वासको मत लिने समय लिइसकेका सुदूरपश्चिमका मुख्यमन्त्री दीर्घ सोडारीलाई सत्ता सहयात्री दल नेकपा एमालेले धोका दिएका कारण अलमलमा परेका छन् । 

गण्डकीका मुख्यमन्त्री अधिकारीले आइतबार विश्वासको मत लिने भएका हुन् । विश्वासको मतका लागि आइतबार दिउँसो ३ बजे बस्ने प्रदेशसभा बैठक बस्ने तय भएको प्रदेशसभा सचिवालयका सूचना अधिकारी प्रेम सुवेदीले जानकारी दिए । एमाले, माओवादी केन्द्र र दीपक मनाङेको समर्थनमा अधिकारी गत चैत २५ गते मुख्यमन्त्री नियुक्त भएका थिए । 

नियुक्त भएको एक महिनाभित्र विश्वासको मत लिने संवैधानिक व्यवस्थाअनुसार मुख्यमन्त्री अधिकारीले विश्वासको मत लिन लागेका हुन् । मुख्यमन्त्री अधिकारीले सभामुखलाई गणना गरेर दाबी पेस गरेपछि निवर्तमान मुख्यमन्त्री कांग्रेस संसदीय दलका नेता सुरेन्द्रराज पाण्डेले गत चैत २७ गते सर्वोच्चमा रिट दायर गरेका थिए । उक्त रिट सर्वोच्च वैशाख १७ गते खारेज गरिदिएको थियो ।

अधिकारीलाई २ सीट रहेको राष्ट्रिय प्रजातन्त्र पार्टी (राप्रपा) ले समर्थन गर्ने भनिएपछि नगर्ने संकेत गरेको छ । यो अवस्थामा विश्वासको मत पाउन सकस देखिन्छ । तर, सर्वोच्चको व्याख्याअनुसार ३० सांसदको समर्थन हुँदा बहुमत पुग्ने गठबन्धन नेताहरू दाबी गर्दै आएका छन् । कांग्रेसका नेताहरू भने विश्वासको मत लिँदा बहुमतका लागि ३१ जनाकै समर्थन हुनुपर्ने अडान लिएका छन् । गण्डकी प्रदेशसभामा ६० जना सांसद छन् ।

यता, विश्वासको मत लिने प्रयोजनाका लागि शुक्रबार बोलाइएको सुदूरपश्चिम प्रदेशसभा बैठक स्थगित हुने सम्भावना देखिएको छ । दलहरूबीच सहमतिको प्रयास असफल भएपछि सभामुख भीम भण्डारीले शुक्रबार साँझ ५ बजेका लागि बोलाइएको बैठक स्थगित गर्ने तयारी गरेका छन् । 

अर्को बैठक कहिले राख्ने भन्नेबारे सभामुख भण्डारीले अहिले छलफल अघि बढाएका छन् । मुख्यमन्त्री सोडारीलाई सत्ता गठबन्धनकै दलहरूको साथ नमिल्ने भएपछि विश्वासको मतको कार्यक्रम स्थगित हुने भएको हो । सहमतिको अधिकतम प्रयास गर्दा पनि सफल हुन सकेको छैन, अब बैठक स्थगित गर्नेबारे छलफल चलिरहेको छ । 

शुक्रबार प्रदेश सभा बैठकअघि बस्ने भनिएको कार्य व्यवस्था परामर्श समितिको बैठक पनि बस्न सकेन । बिहान ८ बजे तय भएको बैठक दिउँसो २ बज्दा पनि बस्न सकेन । सत्तारुढ दल एमालेको अडानले सोडारीले विश्वासको मत लिने कार्यक्रम अनिश्चित बनेको हो । एमालेले शुक्रबार विश्वासको मत नदिने अडान लिइरहेको छ ।