ओली फिरे तर केही बोलेनन्

२० भाद्र, काठमाडौं । प्रधानमन्त्री खड्गप्रसाद ओली सिंगापुरमा स्वास्थ उपचार गराई आज स्वदेश फर्किएका छन् । मृगौलामा समस्या देखिएपछि उनी यही भदौ ५ गते सिंगापुर गएका थिए । दुई साता लामो उपचार पछि उनी आज अपरान्ह स्वदेश फर्किएका हुन् ।

ओलीसँग पत्नी राधिका शाक्यका साथै नेकपाका नेताद्वय वामदेव गौतम र विष्णुप्रसाद पौडेल पनि फर्किएका छन् । त्रिभुवन अन्तराष्ट्रिय विमानस्थलमा अवतरण गरेका ओलीले पत्रकारसँग भने केही बोलेनन् । उनको स्वागतका लागि सभामुख कृष्णबहादुर महरा, कार्यवाहक प्रधानमन्त्री ईश्वर पोखरेल , गृहमन्त्री रामबहादुर थापा, परराष्ट्रमन्त्री प्रदीपकुमार ज्ञवाली लगायत उच्चपदस्थ अधिकारी विमानस्थल पुगेका थिए ।

स्वदेश फर्के लगत्तै उनले राजनीतिक सकृयता बढाउने निकट स्रोतको दावी छ । संभवत ः भोलि नै सचिबालय वैठक बोलाएर महत्वपूर्ण निर्णय लिने अनुमान राजनीतिक वृत्तमा गर्न थालिएको छ । दशैं अगावै उनी मन्त्रिमण्डलमा फेरबदल गरी आफू अनुकूल टिम बनाउने सोचका साथ स्वदेश आएको स्रोतको दावी छ ।

सकेसम्म पार्टीको कार्यकारी अध्यक्ष पद पनि राख्ने छाड्नै परे पुष्पकमल दाहालको काँधमा राखेर आफ्नो स्वार्थ पूरा गर्ने रणनीति बनाउने तयारी रहेको पनि दावी गरिएको छ ।