‘अल बिदा’ ! दुर्गा दाइ

२२ माघ, काठमाडौं । बरिष्ठ पत्रकार एवं नेपाल टेलिभिजनका पूर्वमहाप्रबन्धक दुर्गानाथ शर्माको निधन भएको छ । नेपाल टेलिभिजनको स्थापना कालदेखि लामो समयसम्म काम गरेका शर्माको आज बुधबार निधन भएको हाे ।

काठमाडौं महाराजगञ्ज स्थित मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा उपचारको क्रममा उनको निधन भएको परिवारिक स्रोतले जानकारी दिएकोछ ।

शर्मा मुटुसम्बन्धी समस्याबाट पीडित थिए । ७२ वर्षीय शर्माको शहीद गंगालाल राष्ट्रिय हृदयरोग केन्द्रमा उपचार हुँदै आएको थियो । गत मंगलबार उनलाई मनमोहनमा सारेर थप उपचार गरिँदै थियो । मुटु रोगका बिरामी उनको २४ वर्षअघि ओपन हार्ट सर्जरी गरिएको थियो । इन्फेक्सनको समस्या भएपछि उनलाई अस्पताल लगिएको थियो ।

वि.सं. २००४ सालमा इलाममा जन्मिएका शर्माले २०४२ सालमा नेपाल टेलिभिजनको प्रशारण सुरु हुँदादेखि काम गरेका थिए । उनले टेलिभिजनमा लामाे समय महाप्रबन्धकसम्म भई काम गरेका थिए । शर्माले सुरु गरेको विश्वघटना नामक कार्यक्रम चर्चित थियो । उनका दुई छोरा र श्रीमती छन् । शर्माको आजै पशुपति आर्यघाटमा अन्त्येष्टि गरिने पारिवारिक स्रोतले जनाएको छ ।

गोरखापत्र दैनिकबाट पत्रकारिता सुरु गरेका शर्माले रेडियो नेपालको समाचारवाचक हुँदै नेपाल टेलिभिजनको महाप्रबन्धक भएर काम गरेका थिए । शर्माले नेपाल प्रेस इन्स्टिच्युटले प्रकाशन गरेको ‘प्रसारण पत्रकारिता हाते किताब‘ को सम्पादन पनि गरेका थिए ।

आज नेपाली पत्रकारिता जगतले एक होनाहार पात्र गुमाउनु परेको छ । यस दुःखद् घडिमा शोकमा रहेका परिवारजनलाई धैर्यधारण गर्ने शक्ति मिलोल् भनि भगवन् पशुपतिनाथसँग कामना गर्दछौँ । अल बिदा ! दुर्गा दाइ ।