कोरोनाका कारण उद्योग वाणिज्य महासंघको साधारणसभा जेठ ७ र ८ गते गर्ने निर्णय

६ चैत्र, काठमाडौं । विश्वव्यापी रुपमै फैलिएको कोरोना भाइरसको नियन्त्रणका लागि सरकारले थप कडाई गरेपछि नेपाल उद्योग वाणिज्य महासंघको आसन्न साधारणसभा एक महिना पछि सारिएको छ । निजी क्षेत्रको सशक्त संगठन महासंघको साधारणसभा अब जेठ ७ र ८ गते हुने भएको छ ।

महासंघको विहिबार बसेको पदाधिकारी बैठकले यही चैत २८ र २९ गते हुने भनिएको साधारणसभा हाललाई स्थगित गर्दै नयाँ मिति तोकेको हो । महासंघका वरिष्ठ उपाध्यक्ष शेखर गोल्छासँगको छलफलपछि अध्यक्ष भवानी राणाले सबै पदाधिकारीको एकमतमा साधारणसभा सार्ने निर्णय भएको बताइन्। अब यो निर्णयलाई स्थायी समितिले सदर गर्नुपर्ने हुन्छ ।

सरकारले सबै प्रकारका भेला, सभा सम्मेलन तथा कार्यक्रमहरु डेढ महिना सार्न आव्हान गर्दै सेमी लकडाउनको घोषणा गरेपछि महासंघले पनि साधारणसभा स्थगित गर्ने निर्णय गरेका हो । त्यसबाहेक देशको आपूर्ति व्यवस्था सहज बनाउन पनि महासंघले सरकारलाई सहयोग गर्ने निर्णय गरेको छ ।

महासंघका एकजना जिम्मेवार पदाधिकारीका अनुसार जेठसम्म पनि कारोना भाइरसको संक्रमण नियन्त्रणमा नआई काबु बाहिरको परिस्थिती उत्पन्न भएमा साधारणसभाको अर्को मिति तय हुनेछ।