रुपडिया सीमा नाका एकसाता बन्द

९ चैत्र, नेपालगञ्ज । भारतमा कोरोना भाइरस प्रभावितको संख्या बढ्न थालेपछि संभावित संक्रमण रोक्न नेपालले कडाईका साथ सीमा नाका बन्द गर्न थालेको छ । यसैक्रममा आजबाट पश्चिम नेपालको नेपालगञ्जस्थित रुपडिया (जमुनाहा) नाका एक साताका लागि बन्द गरिएको छ ।

यो नाकाबाट नेपाली र भारतीय नागरिकको आवतजावत रोक्ने उद्देश्यले आजैबाट रोक लगाउन दुवै देशमा पदाधिकारी सहमत भएको जानकारी बाँकेका प्रमुख जिल्ला अधिकारी कुमारबहादुर खड्काले दिएका छन् । तर सामान आवतजावतमा भने कुनै रोकटोक नरहेको पनि उनले बताए ।

आयात निर्यात भने यथावत हुने छ – प्रजिअ खड्काले भनेका छन् । यसका साथै अत्यावश्यक सेवामा समेत कुनै बन्देज नलगाइको जानकारी उनले दिएका छन् । भारतको उत्तर प्रदेशमा कोरोना संक्रमण फैलिएपछि केही दिन यता हजारौं नेपाली यही नाका हुँदै स्वदेश फर्कन थालेका थिए ।

भारतमा कोरोना भाइरस संक्रमितको संख्या तीव्र रुपमा बढिरहेको छ । हालसम्म झण्डै तीन सयमा संक्रमण देखापरेको छ भने पाँच जनाको मृत्यु भइसकेको छ ।