चीनसँगको सीमा विवादमा हुम्लाका सहायक सीडीओले मागे माफी !

९ असोज, काठमाडौं । चीनसँगको सीमा विवादका क्रममा हतारमा अभिव्यक्ति दिएको भन्दै हुम्लाका सहायक प्रमुख जिल्ला अधिकारी दत्तराज हमालले माफी मागेका छन् । चीनले नेपाली भू–भाग अतिक्रमण गरेको भनी विवादास्पद अभिव्यक्ति दिएका हुम्लाका सहायक प्रमुख जिल्ला अधिकारी हमालले गल्ती बोलें, क्षमा चाहन्छु भन्दै माफी मागेका हुन् ।

गृह मन्त्रालयले सोधेको स्पष्टीकरणमा हमालले आफूले हतारमा अभिव्यक्ति दिँदा गल्ती भएको पनि बताएका छन् । गृहको प्रशासन महाशाखामा बिहीबार दिउँसो स्पष्टीकरण पत्र पठाउँदै हमालले स्थानीयले भनेको कुरामा विश्वास गर्दा आफूबाट गल्ती भएको पनि दाबी गरेका छन् ।

सहायक प्रजिअ हमालले नाम्खा गाउँपालिका–६ लिमीमा ११ नम्बर सीमास्तम्भ नै गायब भएको र चीनले एकतर्फी रूपमा भौतिक संरचना बनाएको भन्दै छानबिनका लागि स्थलगत प्रतिवेदन तयार पारेका थिए । उनलाई यो कामका लागि अनुमति र निर्देशन थिएन ।

उनको प्रतिवेदन पाएपछि गृह मन्त्रालयले नापी विभागसँग जानकारी लिएर सहायक प्रमुख जिल्ला अधिकारी हमालको दाबी गलत भएको बताएको थियो । पछि वास्तविकता नबुझेर हतारमा सञ्चारमाध्यमलाई प्रतिक्रिया दिएर गलत हल्ला फैलाएको भन्दै गृह मन्त्रालयले बुधबार स्पष्टीकरण सोधेको थियो ।