एनएमबि बैंकमा अनलाईनबाट नै खाता खोलेर कारोबार गर्न सकिने

१८ असोज, काठमाडौं । एनएमबि बैंक लिमिटेडले भिडीयो केवाईसी सेवा सुरु गरेको छ । भिडियो कलमा आधारित यस किसिमको सेवाबाट ५ मिनेटमै देश वा विदेशमै रही खाता खोल्न सकिने बैंकका म्यानेजर पुरुषोत्तमराज पाण्डेले जानकारी दिए ।

पाण्डेका अनुसार, देश तथा विदेशका कुनै कुनामा बसेर खाता खोलेपछि सहज कारोवार गर्न सकिने बताएका छन् । उनले भने, एनएमबि बैंक नेपाली बैंकिङ्ग जगतमै शुरु देखी अन्त्यसम्मको पुर्ण डिजीटल रुपमा खाता खोल्ने प्रक्रिया शुरु गर्ने पहिलो बैंक हो । ग्राहकहरूले एनएमबिमा भिडियो कल मार्फत अनलाइन नयाँ खाता खोल्न यस डिजिटल सेवाप्रयोग गरेर आफ्नो केवाईसी विवरणहरू पूरा/अपडेट गर्न सक्दछन् ।

एनएमबिले ग्राहकहरूको लागी नेपालमा डिजिटल बैंकिङ्गको अनुभवमा परिवर्तनको शुरुवात गर्दैछ । ग्राहकहरुले अब मोबाइल र इन्टरनेट बैंकिङ्गको परम्परागत उपयोगको परिधि भन्दामाथी उठेर बैंकसम्म नधाईकनै मुख्य बैंकिङ्ग गतिविधिहरु संचालन गर्न सक्दछन । बैंकले जारी गरेकाे विज्ञप्तिमा भनिएकाे छ, हालको परिवेशमा पनि यस प्रकारको सेवाले हाम्रा ग्राहकहरूको लागि घरमै बसी बैंकिङ्ग कारोवार सहज बनाउनुको साथै सवै प्रकारको म्यानुअल कामलाईृ निर्मुल पार्दै पारदर्शिता, त्रुटिरहित र कागज विहीन बैंकिङ्ग प्रदान गर्दछ जुन बैंकको ग्लोबल एलायन्स फर भ्यालु बेस्ड बैंकिङ्गका सदस्यको नाताले वातावरण मैत्री बैंकिङ्ग प्रति प्रतिबद्धता परिपुर्ति गर्नु रहेको छ ।