प्यानलसहित इन्जिनियर्स एशोसिएसनको अध्यक्षमा दर्लामी निर्वाचित

१ चैत, काठमाडौं ।  इन्जिनियर्स एसोसिएसनको अध्यक्षमा डा. हरिबहादुर दर्लामी निर्वाचित भएका छन् । नेपाली कांग्रेसनिकट इन्जिनियरहरूको संस्था सेन्टर फर डेमोक्रेटिक इन्जिनियर्स (सिडेन)का तर्फबाट दर्लामीले नेतृत्व गरेको लोकतान्त्रिक प्यानलले सुरुदेखि नै अग्रता कायम गरेको थियो ।

दर्लामीले एमालेको प्रोग्रेसिभ इन्जिनियरिङ प्रोफेसनल्स एसोसिएसन नेपाल (पेपान) को प्यानलबाट अध्यक्षमा उठेका डा. सुरज लामिछानेलाई पराजित गरेका हुन् ।

दर्लामी प्यानलबाटै उपाध्यक्षमा डा. नारायणप्रसाद, महासचिवमा रविभूषण झा र उपमहासचिवमा सरोज धिताल निर्वाचित भएका छन् ।
कोषाध्यक्षमा दिनेश त्रिपाठी र सहकोषाध्यक्षमा दिपक अधिकारी निर्वाचित भएका छन् ।

पदाधिकारीमा निर्वाचित सबै दर्लामी नेतृत्वको लोकतान्त्रिक प्यानलकै हुन् । मतपरिणामको औपचारिक घोषणा केहि बेरमा हुने निर्वाचन समितिले जनाएको छ ।