स्वास्थ्यको रणनीतिक योजना, सरकारी अस्पताल भएका ठाउँमा निजी अस्पताल खोल्न नदिने

१९ वैशाख, काठमाडौं ।  सरकारले सरकारी अस्पताल भएका ठाउँमा निजी अस्पताल खोल्न नदिने रणनीतिक योजना तयार पारेको छ । स्वास्थ्य तथा जनसंख्या मन्त्रालयले तयार पारिरहेको नेपाल स्वास्थ्य क्षेत्र–रणनीति योजना ‘२०२२–२०३०’ मा सरकारी अस्पताल भएका ठाउँमा निजी अस्पताल खोल्न नदिने उल्लेख गरिएको छ ।

मन्त्रालयले हाल रणनीतिको मस्यौदा तयार पारिरहेको मन्त्रालयका नीति तथा योजना महाशाखा प्रमुख डा कृष्णप्रसाद पौडेलले जानकारी दिए । उनका अनुसार सरकारी अस्पताल नभएका ठाउँमा मात्रै निजी अस्पताल खोल्न दिनेगरी मस्यौदा तयार भइरहेको छ । अहिले सरकारी अस्पताल भएका ठाउँमा निजी रहेको र निजी भएका ठाउँमा सरकारी पनि रहेकाले रणनीतिमा अब निजी अस्पताल खोल्दा सरकारी अस्पताल नभएको ठाउँ खोज्नुपर्ने बनाउन लागिएको हो ।

निजी अस्पतालले सरकारी अस्पताल नभएको ठाउँमा खोल्दा कर छुट दिने तथा सहुलियतसमेत दिइने व्यवस्था गर्दै मन्त्रालयले प्रत्येक नागरिकको स्वास्थ्य अवस्थामा सुधार हुने लक्ष्यसहित रणनीति तयार भइरहेको जनाएको छ । स्वास्थ्य रणनीति तयार गर्न विभिन्न विज्ञ, संघसस्था र सेवाग्राहीसँग सुझाव संकलन गरी गुणस्तरीय स्वास्थ्य सेवा सर्वसुलभ बनाउने उद्देश्यका साथ रणनीति तयार पारिरहेको मन्त्रालयको भनाई छ ।

रणनीतिमा स्वास्थ्यमा लगानी बढाइ गुणस्तर स्वास्थ्य सबैको पहुँचमा पु¥याउने,अप्रत्याशित महामारी तथा स्वास्थ्य आपत्कालीन अवस्थाबाट सिर्जित स्वास्थ्य समस्यालाई पनि रणनीतिमा सम्बोधन गर्न स्वास्थ्यमा थप लगानीको आवश्यकता रहेको पनि औल्याइएको छ । रणनीतिमा जनशक्तिको प्रक्षेपणअनुसार उत्पादन, स्वास्थ्य दक्ष जनशक्तिको परिचालन, स्वास्थ्य अनुशासन र पर्याप्त आर्थिक लगानीको सुनिश्चिता उल्लेख छ ।