बारा प्रहरीको सफलता, मोटरसाइकल चोरीको गिरोह नै नियन्त्रणमा

२४ साउन, बीरगञ्ज । मोटरसाइकल चोरीमा संलग्न ६ जनालाई बारा प्रहरीले पक्राउ गरेको छ । जिल्लामा मोटरसाइकल चोरीका घटनाका उजुरी बढेपछि प्रहरीले थालेको विशेष अभियानबाट मोटरसाइकल चोरीमा संलग्न गिरोह नै फेला परेको हो ।

पक्राउ परेका ६ जना नै एकै स्थानका रहेको पनि प्रहरीले जनाएको छ । एकै स्थानका व्यक्तिहरु मिलेर जिल्लाभरमा मोटरसाइकल चोरीको सृङ्खला चलाएको यस घटनाले देखाएको बाराका प्रहरी उपरीक्षक होबिन्द्र बोगटीले बताए ।

जिल्ला प्रहरी कार्यालय बाराले मंगलबार पत्रकार सम्मेलन गरी गिरोहमा संलग्न ६ जनासहित उनीहरुको साथबाट फेला परेको १२ वटा चोरीको मोटरसाइकल सार्वजनिक गरेको हो ।

साउन १९ गते बाराको बरियारपुरबाट दुइ थान मोटरसाइकल चोरी गरेर भाग्ने क्रममा पक्राउ परेका पचरौता नगरपालिका ७ बेनौलीका २१ वर्षिय विशाल कुमार सहनी र २० वर्षिय भोला पटेलको बयानबाट गिरोहलाई नै समात्न सफल भएको प्रहरी उपरीक्षक बोगटीले बताए ।

पक्राउ पर्नेहरुमा सहनी र पटेलका साथै बेनौलीकै २० वर्षिय वृजमोहन साह सोनार, २० वर्षिय विजय पटेल , २४ वर्षिय हरिनारायण पटेल र २३ वर्षिय बरक सहनी रहेका छन् । उनिहरुको साथबाट चोरी गरि लुकाएर राखिएका नेपाली र भारतीय गरि विभिन्न ब्राण्डका १२ वटा मोटरसाइकल बरामद भएको बारा प्रहरीले जनाएको छ ।