नारायणी अस्पताल प्रशासन र नर्सिङ अधिकृतबीचको विवाद चुलियो

५ भदौ, बीरगञ्ज । बीरगञ्जको नारायणी अस्पतालमा अस्पताल प्रशासन र कर्मचारीबीचको विवाद बाहिरिएको छ । अस्पताल प्रशासनले नियमविपरित कर्मचारीलाई जिम्मेवारी दिन लागेको विषयले विवाद बढाएको हो ।

अस्पतालमा कार्यरत कर्मचारीलाई तह अनुसारको जिम्मेवारी दिनु पर्नेमा अस्पताल प्रशासनले मनलाग्दी जिम्मेवारी दिनखोज्दा कर्मचारी र अस्पताल प्रशासनबीच विवाद चुलिन पुगेको हो ।

अस्पताल प्रशासनले सातौँ तहको नर्सिङ अधिकृत माधवी चौधरीलाई बालरोग विभागको जिम्मेवारी दिन खोजेर उनीभन्दा तल्लो तहका कर्मचारीलाई महत्वपूर्ण जिम्मेवारीमा राखेपछि विवाद बढेको हो ।

सातौँ तहको नर्सिङ अधिकृत रहेकी चौधरीले गएको पाँच वर्षदेखि अस्पतालको मेट्रोनको जिम्मेवारी सम्हालेकी थिइन् । अहिले नवौँ तहको अधिकृत श्रृती साह आएपछि उनलाई मेट्रोनको जिम्मा दिँदै माधवीलाई त्यहाँबाट हटाएर बालरोग विभागमा अस्पताल प्रशासनले चिठी थमाउन खोजेको थियो ।

तर चौधरीले श्रृती बाहेक अहिले रहेका अन्य कर्मचारी मध्ये आफू सिनियर रहेकाले त्यही अनुसारको जिम्मेवारी दिन माग गरेकी छिन् । आफूलाई बालरोगबारे अनुभव पनि कम रहेकोले आफ्नो अनुभव अनुसार प्रसूति विभागको जिम्मेवारी लिन तयार भए पनि अस्पताल प्रशासनले छलफल नै नगरी जवर्जस्ति चिठी मात्रै थमाउन खोजेको उनको आरोप छ ।

‘अहिले म भन्दा जुनियरहरु शाखा सम्हालि रहेका छन्, अस्पताल प्रशासनले त मेरो अनुभव र ज्ञानलाई प्रयोग पो गर्न पर्ने हो त, झन यहाँ त कर्मचारीको मनोबल खसाउने काम भइरहेको छ,’ उनले भनिन् ।

यसअघि सहायक मेट्रोन रहकी श्रुती अहिले मेट्रोन बनेपछि सहायक मेट्रोनमा आफूलाई राख्न अस्पतालका मेडिकल सुपरिटेण्डेण्ट डा. विरेन्द्र प्रधानलाई भेटेरै कुरा राखेको माधवी बताउँछिन् । तर अस्पताल प्रशासनले कुनै कुरा नै नसुनी आफूलाई कम अनुभव रहेको ठाउँमा जवर्जस्ति पठाउन खोज्दा आफूले चिठी नबुझेको उनको भनाई छ ।

यता अस्पताल प्रशासन भने माधवी चौधरीले चिठी नबुझे कारबाही गर्ने रणनीतिमा छ । अस्पतालका मेसु डा।प्रधानले कर्मचारीलाई आवश्यकता अनुसार प्रशासनले खटाउने भन्दै तोकिएको जिम्मेवारी पुरा नगर्ने कर्मचारीलाई कारबाही गरिने बताउँछन् ।

बालरोग विभाग ‘पेडियाट्रिक वार्ड’ को इन्चार्ज पद खाली रहेकाले माधवीलाई त्यहाँ पठाउन खोजेको अस्पताल प्रशासनले बताए पनि उक्त विभागको इन्चार्जमा सुभद्रा चौधरी पहिल्यैदेखि कार्यरत छिन् ।

यता अस्पताल कर्मचारी युनियनले पनि अस्पताल प्रशासनले तह अनुसार कर्मचारी पदस्थापन गर्न पर्नेमा त्यसो नगरेको भन्दै तह अनुसार नै कर्मचारीलाई जिम्मेवारी दिन माग गरेको छ ।

तह अनुसार जिम्मेवारी नदिँदा भविष्यमा समस्या आउने भनेर आफूहरुले अस्पताल प्रशासनको ध्यानाकर्षण गराएको युनियनका रामेश्वर प्रसाद बताउँछन् । ‘फिजिसियनलाई अपरेसनको जिम्मा दिए उसले कस्तो काम गर्ला भनेर सचेत गराएका छौँ,’ उनी भन्छन्, ।