प्रहरी हवल्दारसहित ३ जनालाई भ्रष्टाचार मुद्दामा सफाई

२५ कात्तिक, काठमाडौं । महानगरीय प्रहरी वृत्त नयाँ बानेश्वरमा कार्यरत प्रहरी हवल्दार ताराकुमारी श्रेष्ठसहित ३ जनाले भ्रष्टाचार मुद्दामा सफाई पाएका छन् ।

हिरासतमा रहेको व्यक्तिसँग घुस लिएको आरोपमा अख्तियार दुरुपयोग अनुन्धान आयोगले चलाएको मुद्दामा उनीहरुले विशेष अदालतबाट सफाई पाएका हुन् । विशेष अदालतका न्यायाधीशहरु यमुना भट्टराई, बालचन्द्र वास्तोला र खुशीप्रसाद थारुको इजलासले उनीहरुलाई सफाई दिने फैसला गरेको हो ।

आयोगले प्रहरी हवल्दार ताराकुमारी श्रेष्ठसहित तीन जनाविरुद्ध २०७८ असार ३१ ग्ते भ्रष्टाचार मुद्दा दर्ता गरेको थियो । मुद्दामा हिरासतमा रहेको व्यक्तिलाई धरौटीमा छुटाइदिन्छु भनी ६० हजार रुपैयाँ घुस लिएको आरोप दियो । प्रहरी हवल्दार श्रेष्ठ, उनको लागि पैसा लिने अनिश जोशी र विमानस्थल भन्सार कार्यालयका कर्मचारी राम खड्काविरुद्ध अख्तियारले भ्रष्टाचार मुद्दा दायर गरेको थियो ।

विशेष अदालतले उनीहरुले घुस लिएको कुरा पुष्टि हुन नसकेको भन्दै सफाई दिने फैसला गरेकाे हाे । मुद्दामा जोशी र खड्कासँग ३०÷३० हजार बिगो माग गरिएको थियो । श्रेष्ठमाथि ६० हजार बिगो मागदाबीसहित कैदसजायको माग गरिएको छ ।