बीपी स्वास्थ्य विज्ञान प्रतिष्ठानका रजिष्ट्रारलाई २४ घण्टे स्पष्टीकरण

१५ पुष, धरान । स्वास्थ्य तथा जनसंख्या मन्त्रालयले बीपी कोइराला स्वास्थ्य विज्ञान प्रतिष्ठानका रजिष्ट्रारलाई स्वास्थ्य तथा जनसंख्या मन्त्रालयले २४ घण्टे स्पष्टीकरण सोधेको छ ।

स्वास्थ्य मन्त्रालयअन्तर्गतको आर्थिक वर्ष २०७९/८० को प्रथम त्रैमासिकमा सञ्चालित विकास कार्यक्रम र आयोजनाको समीक्षा बैठकमा उपस्थित नभएको भन्दै प्रतिष्ठानका रजिष्ट्रार सूर्य संग्रौलालाई स्पष्टीकरण सोधेको हो ।

स्वास्थ्य मन्त्रालयका नीति योजना तथा अनुगमन महाशाखा प्रमुख डा. कृष्ण प्रसाद पौडेलले पत्र लेखेर स्पष्टीकरण सोधेका हुन् । ‘मिति २०७९ पुस १२ गते संचालन भएको मन्त्रालय स्तरीय विकास समस्या समाधान उपसमितिको बैठकमा तहाँबाट कुनै पनि पदाधिकारी उपस्थित भएको देखिएन ।

तसर्थ मन्त्रालय स्तरीय विकास समस्या समाधान उपसमिति जस्तो महत्त्वपूर्ण बैठकमा केकेति कारणले उपस्थित हुन नसकेको हो सो को स्पष्टीकरण पत्र प्राप्त भएको २४ घण्टाभित्र पठाउनु हुन यस मन्त्रालय सचिवस्तरीय निर्णयानुसार जानकारी गराइन्छ’ पत्रमा भनिएको छ ।

स्वास्थ्य मन्त्रालयले आयोजना गरेको महत्त्वपूर्ण बैठकमा बीपी प्रतिष्ठानका रजिष्ट्रार संग्रौला अनुपस्थित रहँदा उनको आलोचना हुने गरेको छ । पत्रपछि मन्त्रालयमा हलचल मच्चिएको छ ।