नेपाल चिकित्सक संघको केन्द्रीय उपाध्यक्षमा बीरगञ्जका डा. सिंह दोब्बर मतले विजयी

२५ माघ, बीरगञ्ज । नेपाल चिकित्सक संघको केन्द्रीय उपाध्यक्षमा बीरगञ्जका वरिष्ठ चिकित्सक डा.निरज सिंह विजयी भएका छन् । प्रतिष्पर्धिलाई दोब्बर बढी मतले हराउँदै केन्द्रीय उपाध्यक्ष एवं मधेस प्रदेश संयोजकमा सिंह विजयी भएका हुन् ।

मंगलबार सार्वजनिक मत परिणाम अनुसार सिंहले ३ हजार ८१ मत ल्याउँदा उनका निकटतम प्रतिष्पर्धी रहेका डा. महेश महासेठले १ हजार ५ सय ७८ मत ल्याएका छन् । केन्द्रीय उपाध्यक्ष एवं मधेस प्रदेश संयोजकका लागि तीन जना प्रतिष्पर्धामा रहेका थिए । अर्का प्रतिष्पर्धी अजय कुमार मिश्रले १ हजार १२४ मत ल्याएका छन् ।

केन्द्रीय उपाध्यक्षमा निर्वाचित डा. सिंह लोकतान्त्रिक समूहको प्यानबाट उम्मेदवार बनेका थिए । संघमा एक जना सदस्य बाहेक लोकतान्त्रिकको प्यानल नै निर्वाचित भएको छ । बीरगञ्जको नारायणी अस्पतालमा कार्यरत सिंह वरिष्ठ फिजिसियन हुन् ।

नयाँ नेतृत्व चयनका लागि गएको माघ ६ र ७ गते उपत्यका बाहिर र १९, २० र २१ गते उपत्यका भित्र मतदान भएको थियो । उपाध्यक्षमा विजयी भएसँगै सिंहले चिकित्सकको हक हित र आफूहरुले चुनाबमा उठाएका एजेण्डा कार्यान्वयनमा लाग्ने प्रतिबद्धता जनाएका छन् ।