राष्ट्रपतिको सवारीमा डाक्टर कुटिएपछि चिकित्सक आन्दोलित, ट्रमा सेन्टरका सेवा बन्द

२७ माघ, काठमाडौं । राष्ट्रपति विद्यादेवी भण्डारीको सवारीमा सडमा निस्किएको भन्दै प्रहरीले राष्ट्रिय ट्रमा सेन्टरका एक चिकित्सकलाई घाइते हुनेगरी कुटेपछि तनाव उत्पन्न भएको छ । डा.जनित सिंहलाई प्रहरीले टाउकोमा लाठी प्रहार गरी घाइते बनाएकबो भन्दै अहिले चिकित्सकहरु विरोधमा उत्रिएका छन् ।

शुक्रबार अपराह्न राष्ट्रपति विद्यादेवी भण्डारीको सवारीका बेला डिउटीमा आइरहेका डा सिंह वीर र ट्रमाको बीचमा प्रहरीले कुटपिट गरेको सेन्टरका कर्मचारीले बताएका छन् । ति कर्मचारीका अनुसार प्रहरीले टाउकोमा हिर्काउदा रगत आएको र त्यसपछि भिड पनि जम्मा भएको हो । विरोधमा उत्रेका वीर र ट्रमाका चिकित्सकहरुले इमर्जेन्सी नै रोकेका छन् । दुवै अस्पतालको चिकित्सकहरु जम्मा भएर आन्दोलनमा लागेका छन् ।

अहिले प्रहरी र आन्दोलनरत चिकित्सकबीच छलफल चलिरहेको छ । विरोधको क्रममा चिकित्सक तथा कर्मचारीहरूले आधा घण्टासम्म सडकमा चक्काजाम पनि गरेका थिए । संघीय संसद्को संयुक्त सदनलाई सम्बोधन गरेर राष्ट्रपति भण्डारी फर्कने क्रममा वीर अस्पताल बाहिर हिँडिरहेका चिकित्सक सिंहलाई त्यहाँ सुरक्षामा खटिएका प्रहरीले लाठीचार्ज गरेका थिए ।

उनको टाउँकोमा चोट लागेको छ । सोही घटनाको विरोधमा त्यहाँका चिकित्सकहरुले कारवाहीको मग पनि गरेका छन् । ट्रमा सेन्टर अगाडिको सडकमा सो घटनाको विरोधमा चिकित्सकहरुले प्रर्दशन गर्ने क्रममा चिकित्सक र प्रहरीबीच भनाभनसमेत भएको थियो । सडकमा हिँडेका डाक्टरमाथि प्रहरीले अन्धाधुन्ध लाठी प्रहार गरेको र हातको औँठी र पर्स पनि प्रहरीले नै लगेको एक स्वास्थ्यकर्मीले बताए ।