काठमाडौं उपत्यका ३ वटै जिल्ला जग्गा कित्ताकाट खुल्यो

१० फागुन, काठमाडौं । काठमाडौं उपत्यकाका ३ जिल्लामा जग्गा कित्ताकाट खुलेको छ । उपत्यकाका काठमाडौं, भक्तपुर र ललितपुर गरी ३ वटै जिल्लामा जग्गा वर्गीकरणको काम सकिएसँगै कित्ताकाट खुलेको हो ।

भूमि व्यवस्था तथा अभिलेख विभागको तथ्यांकले उपत्यकामा जग्गा वर्गीकरण सकिएको देखाएको छ । तथ्यांकमा स्थानीय तहले कृषि र गैरकृषि छुट्याएका हुन् ।

२०७९ जेठ २३ गतेदेखि भू–उपयोग नियमावली लागू भएपछि जग्गा व्यवस्थापन नयाँ ऐन–नियममा निर्देशित भएको छ।
अहिले कृषि एकतर्फ र अर्को गैरकृषितर्फ आवासीय, व्यावसायिक, औद्योगिक, खानी तथा खनिज, वन गरी विभिन्न विधामा स्थानीय तहले जग्गा वर्गीकरण गर्ने काम धमाधम गरिरहेका छन् ।

सरकारले मंसिर २३ गतेसम्ममा जग्गाको वर्गीकरणको काम सक्न स्थानीय तहलाई निर्देशन दिएको थियो । वर्गीकरणका काम नसकेको जनाउँदै सरकारले स्थानीय भू-उपयोग परिषदबाट जग्गा वर्गीकरण गर्नाका लागि कित्ताकाट रोकेको  थियो । साेहीबमाेिजम मालपोत कार्यालय जग्गा कित्ताकाट गर्न बन्द गरेकाे थियाे ।

काठमाडौं जिल्लाका काठमाडौं महानगरपालिका, कागेश्वरी मनोहरा नगरपालिका, कीर्तिपुर, गोकर्णेश्वर, चन्द्रागिरी, टोखा, तारकेश्वर, दक्षिणकाली, नागार्जुन, शंखरापुर र बुढानीलकण्ठ गरी ११ वटै पालिकाले वर्गीकरण सकिसकेका छन् ।

भक्तपुरका भक्तपुर नगरपालिका, सूर्यविनायक नगरपालिका, मध्यपुरथिमि, चाँगुनारायण नगरपालिका गरी चार वटा पालिकाले वर्गीकरण सकेका छन् ।

ललितपुरका ललितपुर महानगरपालिका, महालक्ष्मी नगरपालिका, गोदावरी, बागमती गाउँपालिका, माहांकाल गाउँपालिका, कोन्जयोसोम गाउँपालिका गरी ६ वटा स्थानीय तहले काम सकेको विभागको तथ्यांक छ ।

कित्ताकाट खुलेसँगै जग्गा व्यवसायीहरू सल्बलाउन थालेका छन् ।