संसद बैठकमा मर्यादित शब्द प्रयोग गर्न सांसदहरूलाई सभामुखको निर्देशन

२३ चैत, काठमाडौं । सभामुख देवराज घिमिरेले प्रतिनिधिसभा सदस्यहरुलाई सदनको बैठकमा बोल्दा मर्यादित शब्द प्रयोग गर्न निर्देशन दिएका छन् । 

बिहीबार बसेको प्रतिनिधिसभाको बैठकमा नेकपा माओवादी केन्द्रका सांसद लेखनाथ दाहालले सांसदहरूलाई मर्यादित ढंगले सञ्चालन गर्न सभामुखको ध्यानाकर्षण गराएका थिए । त्यसपछि सभामुख घिमिरेले सांसदहरुलाई संसदीय मर्यादा ख्याल गर्न आग्रह गरेका हुन् ।

दाहालले बोल्नुअघि एमाले सांसद रघुजी पन्तले सरकारको सय दिन उप्लब्धिहीन र मन्त्रिमण्डललाई समेत पूर्णता दिन असफल रहेको भन्दै सरकार जनताका लागि आशा र भरोसा गर्न योग् नभएको टिप्पणी गरेका थिए । उनले सरकार भ्रष्टाचारीको संरक्षक बनेको बताउँदै गोरखापत्रमा पढ्नसमेत लाज लाग्ने किसिमका ३७ बुँदे विवरण छपाएको आरोप लगाएका थिए । साथै पन्तले उनले सरकार एउटासँग बिहे गरेर अर्कैसँग बसेको जस्तो भएको टिप्पणी गरेका थिए । पन्तको उक्त भनाईप्रति माओवादी केन्द्रका सांसद सूर्यमान दोङले अमर्यादित भन्दै संसद रेकर्डबाट हटाउन सभामुख घिमिरेको ध्यानाकर्षण गराएका थिए ।

बैठकमा विशेष समयमा बोल्दै एमालेका सांसद ठाकुर गैरेले सरकारसँग जनताले भरोसा गर्न योग्य नीति र कार्यक्रम नै नरहेको भन्दै चर्को आलोचना गरेका थिए । मुख्यगरी एमाले, राप्रपा र रास्वपाका सांसदहरूले सरकारकाे कामकाे ककडा शब्दामा आलाेचना गरेका थिए ।

सभामुख घिमिरेले सासदहरुबीच शब्दावलीको प्रयोगलाई लिएर प्रतिनिधिसभा बैठक संचालनसम्बन्धी नियमावलीबारे स्मरण गराएका थिए ।