नेपाली नागरिकता लिएको अभियोगमा तिब्बती शरणार्थी पक्राउ

२४ चैत, काठमाडौं । झुटा विवरण पेस नेपाली नागरिकता लिएको आरोपमा प्रहरीले एक तिब्बती महिला शरणार्थीलाई पक्राउ गरेको छ ।

जिल्ला प्रशासन कार्यालय काठमाडौंबाट नेपाली नागरिकता लिएकी २७ वर्षकी निमा ल्हामो गुरुङ पक्राउ परेकी काठमाडौं उपत्यका अपराध अनुसन्धान कार्यालयले जनाएको छ । उनलाई प्रहरीले बिहीबार वौद्धबाट पक्राउ गरेको हो ।

२ वर्षअघि तिब्बतबाट भारतको बाटो हुँदै नेपाल प्रवेश गरेकी उनले बौद्ध टुसालमा रहेको शरणार्थी क्याम्पमा बसोबास गर्ने व्यक्तिमार्फत नागरिकता बनाउने गिरोहका कृष्णबहादुर कटुवालको सहयोगमा नागरिकता लिएको खुलेको छ । उनले नागरिकता लिँदा लाखौं रुपैयाँ खर्च गरेको खुलेको छ । उनको असली नाम भने प्रहरीले खुलाएको छैन ।

प्रहरीले तिब्बती शरणार्थीलाई नेपाली नागरिकता बनाउने कार्यमा संलग्नता आरोपमा कटुवालसहित ५ जनालाई यसअघि नै पक्राउ गरिसकेको छ ।