सरकारसँग वार्ता गर्न मिटरब्याज पीडितले बनाए वार्ता टोली

२६ चैत, काठमाडौं । काठमाडौंमा संघर्षरत मिटरब्याजी पीडितको दोस्रो टोलीले सरकारसँग वार्ताका लागि टोली गठन गरेको छ । मिटरब्याज तथा ठगीविरुद्ध काठमाडाैंसहित दर्जन बढी जिल्लाहरूमा संघर्ष चलाइरहेको किसान मजदुर संघर्ष समितिले अवदेश कुशवाहको संयोजकत्वमा १९ सदस्यीय वार्ता टोली गठन गरेको हो । 

वार्ता टोलीमा ११ जिल्लाका संघर्ष समिति अध्यक्षसहित अन्य जिल्लाका पीडित र अभियन्ता नीर्ग नवीन समावेश छन् । यसअघि सरकारले समस्या समधानका लागि भन्दै गृह मन्त्रालय शुक्रबार सहसचिव प्रदिपकुमार कोइरालाको संयोजकत्वमा ५ सदस्यीय टोली बनाएर पीडितलाई वार्तामा बोलाएको थियो । 

वार्ताटोली गठन गरेर सरकारले शान्तिपूर्ण तवरबाट पीडितहरुलाई न्याय दिन तयार रहेको बेला संघर्ष समितिले संघर्षमा जारी राखेको भन्दै शुक्रबार पीडितहरुलाई धरपकड समेत गरिएको थियो । सरकारले चर्को ब्याजमा ऋण प्रवाह गर्ने र ऋण चुक्ता गरेपछि पनि दृष्टिबन्धक राखिएका सम्पत्ति फिर्ता नगर्ने कार्यलाई अपराधिक कार्यकाे दर्जमा राखेर त्यसमा संलग्नलाई कारवाहीको दायरामा ल्याउन तयारी गरिरहेको छ ।