विद्यार्थीलाई किताब र पोशाक बेच्ने विद्यालयलाई काठमाडौं महानगरले कारबाही गर्ने

२६ चैत, काठमाडौं । अबदेखि काठमाडौं महानगरपालिकाभित्र संचालित विद्यालयहरुले विद्यार्थीलाई किताब र पोशाक बिक्री गरेमा कारवाही भोग्नु पर्ने भएका छन् । महानगरको शिक्षा विभागले हालै संस्थागत सम्पूर्ण विद्यालयहरुलाई परिपत्र गर्दै यस्तो बताएको हो । 

विभागका अधिकारी रामप्रसा सुवेदीद्वारा प्रेषित परिपत्रमा संस्थागत विद्यालयहरूले किताब र पोशाक बेचेको गुनासो आइरहेको जनाउँदै संस्थागत विद्यालय मापदण्डा तथा संचलान निर्देशिका २०६९ले गरेको विद्यालयले आफैंले किताब बेच्न नपाउने र विद्यार्थीहरुलाई ड्रेसकोड उप्लब्ध गराउनुपर्ने व्यवस्था भइरहेकोमा सचेत गराइएको छ । निर्देशिका भएका सम्पूर्ण व्यवस्था पालना गर्न परिपत्रमा भनिएको छ । 

नियम उल्लंघन गरेको पाइएमा त्यस्ता विद्यालयलाई कानूनबमोजिम कारवाही गरिने समेत परिपत्रमा स्पष्ट पारिएको छ । कारवाही गरेबाट उत्पन्न परिणामको सम्पूर्ण जिम्मेवारी विद्यालयका प्रिन्सिपल हुने समेत अधिकारी सुवेदी  स्पष्ट पारेका छन् । कक्षा १२ सम्मलाई विद्यालय तह मानिन्छ ।

यसैबीच महानगरका मेयर बालेन साहले आइतबार आफ्नो फेसबुक पेजमा सन्देश लेख्दै विद्यार्थीलाई विद्यालयकोा तर्फबाट किताब र पोशाक बिक्री नगर्न आग्रह गर्दै निर्देशिकाको पूर्ण पालना गर्न आग्रह गरेका छन् । 

‘विद्यालय आफैँले किताब बेच्ने गरेको र पोसाकसमेत सम्बन्धित ठाउँबाट नै किन्नु भनेर अभिभावकलाई बाध्य गराएको गुनासो पटक पटक आइरहेकाले विद्यालयको सो कार्य संस्थागत विद्यालय मापदण्ड तथा सञ्चालन निर्देशिका २०६९ अनुसार दण्डनीय भएको स्मरण गराइन्छ । साथै, सम्पुर्ण विद्यालयहरुलाई संस्थागत विद्यालय मापदण्ड तथा सञ्चालन निर्देशिका २०६९ अनुसार कार्य गर्न गराउन हुन अनुरोध छ’ उनले लेखेका छन् ।