सामाजिक सुरक्षा भत्ता कटौती गर्न अर्थसचिवको सुझाव

२६ चैत, काठमाडौं । सरकार आगामी आर्थिक वर्ष २०८/८१ को बजेट निर्माणको तयारीमा जुटेका बेला अर्थसचिव तोया रायले खर्च धान्न नसकिने अवस्था आएको भन्दै वृद्धवृद्धा लगायतकालाई दिइदै आएको सामाजिक सुरक्षा भत्ताको प्रावधान कटौती गर्नुपर्ने बताएका छन् । अहिले आगामी आर्थिक वर्षको बजेटमा लागेको मन्त्रालयले बजेटसँग सम्बन्धित विषयमा खुला सुझाव मागिरहेको छ ।

मन्त्रालयले सरोकारवालाबाट १५ वैशाखसम्म आइपुग्ने गरी सुझाव मागेको छ । संघसंस्था, बुद्धिजिवी, विज्ञ, राजनीतिक दल, व्यवसायी, समाजसेवी, पेशाकर्मी, कर्मचारी, सञ्चारकर्मी तथा आम सर्वसाधारणले अर्थमा बजेटसँग सम्बन्धित सुझावहरु पठाउन सक्ने अर्थले माग गरेलगत्तै अर्थसचिव रायले सामाजिक सुरक्ष भत्ता कटौती गर्न सुझाव दिएका छन् । 

आयतबार आर्थिक पत्रकारहरुसँगको भेटमा रायले सरकारले अब लामो समय समाजिक सुरक्षा भत्ता बाँड्न नसक्ने र यसलाई कटौती गर्नुपर्ने बताए । रोजगारीमा आवद्ध भएका हरेक नागरिक अनिवार्य समाजिक सुरक्षा कोषमा आवद्ध हुन जरुरी रहेको भन्दै उनले सरकारले वार्षिक रुपमा करिब एक सय अर्ब रकम समाजिक सुरक्षा भत्तामा मात्रै खर्च गर्नेे गरेकाले राज्यकोषबाट यसरी सामाजिक सुरक्षा भत्ता बाँड्ने विद्यमान परिपाटी हटाउन आवश्यक रहेको भनाइ राखे । 

अर्थसचिव रायले भने, ‘अहिले पनि सरकारले एक सय अर्ब भन्दा बढी रकम सामाजिक सुरक्षा भत्तामा खर्च गरिरहेको छ । यसरी अर्बौं रुपैया कुनै योगदान बिना सामाजिक सुरक्षा भत्ता दिन सरकारलाई गाह्रो हुन्छ । सरकारले लामो समयसम्म कुनैपनि योगदान बिना सामाजिक सुरक्षा भत्ता जारी राख्ने अवस्थामा छैन ।’ सचिव रायले वर्तमान अवस्थामा देशमा राजस्व संकलनको अवस्था जटिल रहेको भन्दै राजस्व चुहावटको विषयमा सरकारले माफी दिन नसक्ने बताए । 

उनले अर्थतन्त्र संकटग्रस्त भएकोतर्फ संकेत गर्दैै थप कठोर निर्णय नगरे अवस्था झनै भयावह हुनसक्ने बताए । राजस्व लक्ष्यअनुरुप असुली हुन नसकेको अवस्था रहेको र तलव समेत खुवाउन नसक्ने अवस्थालाई दृष्टिगत गरी चालु खर्चमा कडाइका साथ कटौती गर्न आवस्यक रहेको बताए ।  अर्थतन्त्रमा आएको मन्दीले सरकारी खाताको अवस्था नाजुक रहेको भन्दै उनले पचास वर्षयताकै राजस्वमा गम्भीर समस्या देखिइरहेको बताए ।