कोशीमा बेपत्ता ३ युवकमध्ये एक मृत फेला

६ वेशाख, विराटनगर । सप्तकोशी नदीमा नुहाउने क्रममा डुबेर बेपत्ता भएका ३ एक युवकमध्ये एकको शव फेला परेको छ । आफन्तको श्राद्धमा जाने कममा सुनसरीको वराहक्षेत्रस्थित कोशी नदीमा बुधबार बिहानदेखि तीन युवक बेपत्ता भएका थिए ।

नदीमा बेपत्ता भएकामध्ये झापाको दमक नगरपालिका–२ का १७ वर्षीय नवीन न्यौपानेको शव घटनास्थल नजिकै कोशीको भंगालोमा फेला परेको सुनसरीका एसपी प्रभु प्रसाद ढकालले जानकारी दिए ।

उनका अनुसार बेपत्ता रहेका दमक ९ का १९ वर्षीय रुद्र न्यौपाने र मोरङ उर्लावारी ७ का १८ वर्षीय राज गुरागाईँको खोजी भइरहेको छ ।

खोजी कार्यमा सशस्त्र प्रहरी बल र नेपाल प्रहरी गोताखोर टोलीसहित स्थानीयहरू खटिरहेको उनले बताए । ती युवकहरू आफन्तको श्राद्ध गरिएको स्थानबाट नुहाउनका लागि कोशी किनारमा जाँदा बेपत्ता भएको प्रहरीले जनाएको छ ।