तनहुँकाे मतगणना आधा सकियाे, स्वर्णिमलाई झण्डै ५० प्रतिशत

११ वैशाख, काठमाडौं । तनहुँ १ मा आइतबार भएको उपनिर्वाचनको मतगणना करिब आधा सकिएको छ । निर्वाचन क्षेत्रमा पर्ने ४२ वडामध्ये २२ वडाको मतगणना सकिएको छ । ३१ हजार २११ मतगणना सकिएको जनाइएको छ । 

पछिल्लो मतगणना परिणाम अनुसार राष्ट्रिय स्वतन्त्र पार्टी (रास्वपा)का उम्मेदवार  स्वर्णिम वाग्लेले माधै १५ हजार ९६० मत पाएका छन् ।

सत्ता गठबन्धनका साझा उम्मेदवार नेपाली कांग्रेसका गोविन्दराज भट्टराईले ‍ ९ हजार १२२ र  नेकपा (एमाले)का सर्वेन्द्र खनालले जम्मा ५,१६६ ल्याएका छन् । राप्रपाका शोभा गुरुङले निकै थोरै मत पाएकी छन् । 

कांग्रेस, एमाले र माओवादी केन्द्रकै गढ मानिने क्षेत्र भानु नगरपालिका र आँबुखैरेनीबाट वाग्लेलाई भारी मत गएको मत परिणामले देखाएको छ । मतगणना जिल्ला समन्वय समितिको सभा हलमा दुई ठाउँमा भइरहेको छ । यो क्षेत्रमा १ लाख २३ हजार २२३ मतदाता रहेकामा ५३ प्रतिशत मत खसेको निर्वाचन आयोगको दाबी छ ।

यसअघि यो क्षेत्रबाट निर्वाचित रामचन्द्र पौडेल राष्ट्रपति निर्वाचित भएपछि उपनिर्वाचन भएको हो । बारा २ र चितवन २ मा भएको उपनिर्वाचनको मतगणना पनि भइरहेको छ ।