प्रदेश सांसद पौडेलले गरे चुनावी खर्च सार्वजनिक

११ वैशाख, काठमाडौं । लमजुङको प्रदेशसभा ‘ख’बाट निर्वाचित नेपाली कांग्रेसका प्रदेशसभा सांसद भेषबहादुर पौडेलले आफ्नो चुनावी खर्च विवरण सार्वजनिक गरेका छन् । 

गत मंसिर ४ गतेको निर्वाचनमा लमजुङ प्रदेशसभा ‘ख’बाट गण्डकी प्रदेश सभामा निर्वाचित भएका पौडेलले सोमबार खर्च विवरण सार्वजनिक गरेका हुन् । उनले झण्डै नौ लाख रुपैयाँ खर्च भएको विवरण सार्वजनिक गरेका छन् ।

पत्रकार सम्मेलन गरेर उनले खर्च विवरण सार्वजनिक गरेका हुन् । सवारीसाधन बाँड्दा शीर्षकमा १ लाख ३४ हजार रुपैयाँ,  इन्धन शीर्षकमा ७७ हजार ६ सय १५ रुपैयाँ ,खाना तथा खाजा कालागि १ लाख ४४,००० रुपैयाँ, झण्डा तथा ब्यानर निर्माणको लागि १ लाख ८२ हजार २०० रुपैयाँ र पर्चा पम्प्लेटमा तीन लाख ४४२०० गरी कुल ८ लाख ८१ हजार १५ रुपैयाँ खर्च भएको उनले जानकारी दिए । 

सोही विवरण निर्वाचन आयोगलाई बुझाएका छन् । खर्चको विवरण निर्वाचन सम्पन्न भएको ३५ दिनभित्र बुझाउनुपर्ने प्रावधान भए पनि अधिकांश उम्मेदवारहरुले अहिलेसम्म खर्च सार्वजनिक गरेका छैनन् ।