सन्दीपविरुद्धको मुद्दामा सुनुवाइ सकिएन, अर्काे सुनुवाइ २४ गते

११ वैशाख, काठमाडौं । क्रिकेटर सन्दीप लामिछानेविरुद्ध बलात्कार कसुरसम्बन्धी मुद्दामा सोमबार सुनुवाइ सकिएन । काठमाडौं जिल्ला अदालतमा न्यायाधीश दीपक ढकालको इजलासमा मुद्दाको अन्तिम टुंगो लगाउन सुनुवाइ सुरु भएको थियो ।

सुनुवाइका क्रममा वादी पक्षका सरकारी वकिलको बहस सकिए पनि निजी कानुन व्यवसायीको बहस नसकिएकाले सुनुवाइ स्थगित गरिएको अदालत प्रशासनले जनाएको छ । बाँकी बहस वैशाख २४ मा हुने जनाइएको छ ।

साेमबार मुद्दाका प्रतिवादी सन्दीपका तर्फबाट वरिष्ठ अधिवक्ता द्वय शम्भु थापा र रमण श्रेष्ठ तथा अधिवक्ता सरोजकृष्ण घिमिरेलगायतले बहस गरेका थिए ।

लामिछानेविरुद्ध एक नाबालिकाले गएको भदौ ५ गते राति काठमाडौंको पिंगलास्थानस्थित होटल काठमाडौं इनमा पुर्याएर बलात्कार गरेको आरोप लगाउँदै भदौ १४ मा गौशाला प्रहरीमा जाहेरी दिएकी थिइन् । 

जाहेरीका आधारमा प्रहरीले असोज २० गते सन्दीपलाई पक्राउ गरी अनुसन्धानपश्चात सरकारी वकिलकाे कार्यालयमार्फत कार्तिक १४ गते अदालतमा मुद्दा दायर गरेको थियो । 

मुद्दाको प्रारम्भिक सुनुवाइमा कात्तिक २९ गते न्यायाधीश सरोजकृष्ण घिमिरेको इजलाशबाट भएको आदेश सन्दीप जेल परेका थिए । तर उनले उच्च अदालतमा पाटनमा दिएको पुनरावेदन रिट निवेदनमाथि सुनुवाइ गर्दै  उच्च अदालतले माघ २७ मा २० लाख रूपैयाँ धरौटीमा सन्दीपलाई छाडेको थियो । 

आदेशमा थुनामुक्त भएका उनी अहिले नेपाल क्रिकेट संघ (क्यान)ले राष्ट्रिय टोलीमा फिर्ता ल्याएर नियमित क्रिकेट खेलिरहेका छन् ।