बुहारीको हत्याको विरोधमा महोत्तरीकाे मलहनिया तनावग्रस्त, प्रहरीद्वारा हवाइ फायर

११ वैशाख, काठमाडौं । महोत्तरीको गौशालामा महिलालाई विष सेवन गराएर हत्या गरेको भन्दै स्थानीयले आरोपितको घरमा तोडफोड गरेका छन् । 

सोमबार गौशाला नगरपालिका–४ मलहनिया पोखरी टोलमा आरतीदेवी साहलाई परिवारका सदस्यहरुले विष सेवन गराएर हत्या गरेको भन्दै आरतीको माइती पक्षसहित छिमेकीसमेत प्रदर्शनमा उत्रिएका छन् । 

उनीहरुले सडक अवरुद्ध गरेर विरोध प्रदर्शन गर्दै आरोपितको घरमा आक्रमण गरेपछि प्रहरीले स्थितिलाई नियन्त्रणमा लिन भन्दै २२ हवाइ फायर समेत गरेको छ । 

डेढ सयभन्दा बढीको समूहमा आएको आक्रोशितको भीडले मृतकका श्रीमानको घरमा आक्रमण गरेको थियो । भीडको ढुंगा प्रहारबाछ नेपाली प्रहरीतर्फ दुई जना र सशस्त्र प्रहरीका ३ जना घाइते भएका छन् । अहिले घटनास्थलमा प्रहरीको संख्या बढाइएको छ ।

मृतक आरतीका श्रीमान ३९ वर्षीय उमेश साहलाई प्रहरीले पक्राउ गरी अनुसन्धान जारी राखेको जनाइएको छ ।