उपधारा ३ अनुसार सरकार गठनको आह्वान गर्न एमालेको माग

११ वैशाख,काठमाडौं । नेकपा एमालेले लुम्बिनी प्रदेश प्रमुखसँग ठूलो दलको हैसियतमा सरकार गठनका लागि आह्वान गर्न माग गरेको छ । प्रदेशसभाबाट सोमबार विश्वासको मत नपाएपछि मुख्यमन्त्री लिला पदमुक्त भएका थिए । पदमुक्त भएका गिरीकै नेतृत्वमा पुनः सरकार बनाउन एमालेले प्रदेश प्रमुखलाई पत्र बुझाएको छ । लुम्बिनीमा एमालेले सबैभन्दा ठूलो दल छ । 

सोमबार बहुमतको सरकारबाट बाहिरिएको एमालेले संविधानको धारा १६८ को उपधारा ३ अनुसार पुनः संसदीय दलका नेता लीला गिरी नेतृत्वमा सरकार बनाउने तयारीसहित प्रदेश प्रमुखलाई उक्त आग्रह गरेको हो । कामचलाउ मुख्यमन्त्री गिरीले सोमबार नै प्रदेश प्रमुख अमिक शेरचनलाई आग्रहपत्र बुझाएका छन् । विश्वासको मत नपाएपछि प्रदेश प्रमुख अमिक शेरचनले गिरी नेतृत्वको सरकारलाई कामचलाउ सरकारको रुपमा काम गर्न जिम्मेवारी तोकेका थिए । 

यसलगत्तै सोमबारको मन्त्रिपरिषद् बैठकले धारा ३ अनुसार सरकार गठन गर्न आग्रह गरेको पत्र प्रदेश प्रमुखलाई बुझाएको हो । एमाले संसदीय दलका नेतासमेत रहेका मुख्यमन्त्रीले धारा ३ अनुसार ठूलो दलको हैसियतमा पुनः सरकार बनाउन आह्वान गर्न आग्रह गरिएको बताए । यसअघि दलको कार्यालय देउखुरीमा बसेको एमाले संसदीय दलको बैठकले धारा ३ अनुसार सरकार बनाउन पहल गर्ने निर्णय गरेको थियो । 

श्वासको मतमा फेल भए पनि ठूलो दलको हैसियतमा सरकार गठन प्रक्रियामा जाने सुविधा रहेको एमालेको दावी छ । नयाँ सरकार गठन गरेर पुनः एक महिनाभित्र विश्वासको मत लिन नसेकोको अवस्थामा मात्रै अर्को धारामा जानुपर्ने एमालेको तर्क छ । लुम्बिनी प्रदेशमा सोमबार भएको मतदानमा मुख्यमन्त्री लीला गिरीको पक्षमा ३३ मत र विपक्षमा ५३ मत परेको थियो ।

एमाले र राप्रपाबाहेक सबैले विपक्षमा मतदान गरेका थिए । यसअघि ८ दलका ५३ सांसदहरुले कांग्रेस नेता डिल्ली चौधरीलाई धारा २ अनुसार सरकार बनाउन दाबी पेस गरिसकेका छन् ।  प्रदेश प्रमुख कार्यालयले अब नयाँ सरकार गठनका लागि कुन धाराअनुसार आह्वान गर्ने भन्ने खुलाएको छैन । प्रदेश प्रमुखको सचिवालयले प्रदेश प्रमुखले कानुनविद्हरुसँग छलफलमा रहेको जनाएको छ ।

लुम्बिनी प्रदेशमा सबैभन्दा ठूलो दल एमालेको २९, कांग्रेसको २७, माओवादीको १०, राप्रपा ४, नागरिक उन्मुक्ति पार्टी ४, जनमत पार्टी ३, जनता समाजवादी पार्टी ३, लोकतान्त्रिक समाजवादी पार्टी ३, स्वतन्त्र २, जनमोर्चा १, एकीकृत समाजवादी १ सांसद छन् ।