गण्डकी प्रदेशमा बहुमतको सरकार गठन गर्न आह्वान

१२ वैशाख, काठमाडौं । गण्डकी प्रदेशमा नयाँ सरकार गठनका लागि दाबी पेस गर्न आह्वान गरिएकाे छ ।

मुख्यमन्त्री खगराज अधिकारीले वैशाख ९ गते सदनबाट विश्वासको मत पाउन नसकेर पदमुक्त भएपछि प्रदेश प्रमुख पृथ्वीमान गुरुङले बहुमतको नयाँ सरकार गठन गर्न आह्वान गरेका हुुन् । उनले दाबी पेसका लागि आजदेखि यही वैशाख १४ गते दिउँसो ४ बजेसम्मको समय दिएका छन् ।

प्रमुख गुरुङबाट संविधानको १६८ को उपधारा २ अनुसार सरकार गठन गर्न आह्वान भएको प्रमुखको कार्यालयका प्रवक्ता चण्डिप्रसाद अर्यालद्वारा मंगलबार जारी विज्ञप्तिमा उल्लेख छ । 

प्रदेश सभामा प्रतिनिधित्व गर्ने  दुई वा दुईभन्दा बढी दलको समर्थनमा प्रदेशसभा सदस्यले मुख्यमन्त्रीमा दाबी पेस गर्न विज्ञप्तिमा भनिएको छ । 
पदमुक्त भएका एमाले नेतृत्वको अधिकारी सरकार पनि यही धाराअनुसार गठन भएको थियो । 

गण्डकी प्रदेशसभामा ६० सांसद छन् । बहुमतको सरकार गठन गर्न ३१ जना आवश्यक पर्छ । जसमध्ये नेपाली कांग्रेस २७, एमाले २२, माओवादी केन्द्र ७,  राप्रपाको २ र एकीकृत समाजवादीसँग एक सांसद रहेका छन् ।