लुटपाटकै लागि निरा पाण्डेको हत्या गरेकाे अभियुक्तको प्रारम्भिक बयान

१७ वैशाख, काठमाडौं । यही वैशाख ७ गते कपनको सरस्वतीनगरमा ‘निरु किचेन’की संचालक बाग्लु«ङकी निरा पाण्डे आचार्यको हत्या लुटपाटकै उद्देश्यबाट भएको संकेत प्रहरीको प्रारम्भिक अनुसन्धानबाट मिलेको छ । 

हत्याको संलग्नताको आरोपमा ‘बाउन्सर’ विनोद विकलाई शनिवार मात्र झापाबाट पक्राउ गरिएकोछ । विकले लुटपाटकै लागि पाण्डेको हत्या गरेको बयान दिएको प्रहरीको दाबी छ । सामान किन्ने बहानामा पसल छिरेका विकले सिक्री लुट्न थालेपछि प्रतिकार भएकाे र त्यस क्रममा साथमा रहेकाे छुराले पटकपटक प्रहार गरेर हत्या गरेकाे भनी विकले बयान दिएकाे प्रहरीकाे भनाइ छ । अभियुक्त विक मेचीनगर नगरपालिका १० स्थित धुलाबारीका बासिन्दाभएकाे खुलेकाे छ ।

वैशाख ७ गते दिउँसो साढे २ बजेतिर पसलमै बीभत्सा तरिकाले हत्या गरिएको थियो । निराको शरीरमा धारिलो चक्कुले २० पटकभन्दा बढी प्रहार भई मृत अवस्थामा पसलमै फेला परेकी थिइन् । विकलाई प्रहरीको प्राविधिक कोणबाट गरिएको अनुसन्धानबाट फेला पारिएको हो । पसलमा छिर्दा अनुहार नचिनिने गरी माक्स लगाएकाे र हत्या गरेर मास्क लगाएरै बाहिर निस्किएकाे समेत खुलेकाे छ ।

विनोद बस्ने गरेको काठमाडौँस्थित कोठामातलासी लिँदा हत्यामा समयमा प्रयोग भई रगत लागेको कपडा, मृतकको सुनको सिक्री र अन्य केही प्रमाण बरामद भएको प्रहरीको दाबी छ । सीसीटीभीमा देखिएकाे विकले बाेकेकाे झाेला समेत बरामद भएकाे जनाइएकाे छ । हत्या गरी उनी भागेर झापा पुगेको पाइएको छ । प्रहरीले सुक्ष्म अनुसन्धानपछि उनलाई पक्राउ गर्न सफल भएको हो। 

हत्या भएको साता बित्दा पनि प्रहरीले हत्यारालाई पक्राउ गर्न नसकेको भन्दै आफन्त, माइती तथा अधिकारकर्मीहरुले काठमाडौंमा दिनहुँजसो प्रदर्शन गर्दै आएका छन् । प्रदर्शन नरोकिएपछि प्रहरीले शुक्रबार मात्र केन्द्रीय अनुसन्धान ब्यूरोका प्रमुख एआईजी किरण बज्राचार्यको संयोजकत्वमा ७ सदस्यीय अनुसन्धान समिति समेत गठन भएको थियो । 

आरोपित विक पहिले ठमेलको एक क्लबमा बाउन्सरको रूपमा काम गर्ने गरेको तर पछिल्लो समय उनी बेरोजगार रहेको र खर्चका लागि निराले घाँटीमा लगाएको सुनको सिक्री लगायत गरगहना र नगद लुटन हत्या गरेको खुलेको दाबी गरिएको छ ।

नगद चाहि कति लुटेको हो ? भन्नेबारे फरकफरक बयान दिँदै आइरहेको स्रोतले जनायो । मृतका श्रीमान हत्यास्थानदेखि २०० मिटर जतिको दूरीमा पसल चलाउँदै आइरहेका छन् । हत्यारा पत्ता लगाउन नसकेपछि आशंकामा उनलाई प्रहरीले निगरानीमा राख्दै आएका छन् ।