परराष्ट्र मन्त्री एनपी साउद बेलायत प्रस्थान

२१ वैशाख, काठमाडौं । परराष्ट्र मन्त्री नारायणप्रकाश साउद (एनपी) बिहीबार बेलायत प्रस्थान गरेका छन् । बेलायतका राजाको राज्याभिषेक समारोहमा सहभागी हुन परराष्ट्र मन्त्री साउद आज बिहान ११ बजे त्यसतर्फ प्रस्थान गरेका हुन् ।

साउदसँगै पत्नी ज्योत्सना र स्वकीय सचिव जोशी बेलायत प्रस्थान गरेका छन् । परराष्ट्र मन्त्री साउद बेलायत जाने कार्यक्रम बुधबारको मन्त्रिपरिषदले स्वीकृत गरेको थियो । राज्याभिषेक कार्यक्रम ३ दिनसम्म चल्नेछ । त्यसपछि मन्त्री साउद वैशाख २६ गते स्वदेश फर्किने कार्यक्रम छ । 

यसअघि राज्याभिषेक समारोहमा राष्ट्रपति रामचन्द्र पौडेले जाने निधो भएपनि स्वास्थ्याराम गर्नुपर्ने भएका कारण मन्त्री साउद गएका हुन् । समाराेहमा विश्वभरका राष्ट्रप्रमुखलाइ निम्ताे दिइएकाे अन्तर्राष्टिय संचारमाध्यमहरूले जनाएका छन् ।