काठमाडौंका अव्यवस्थित तार विद्युत प्राधिकरण र इन्टरनेट प्रदायक कम्पनीले नै हटाउने

२४ वैशाख, काठमाडौं । काठमाडौं महानगरपालिकाभित्रका अव्यवस्थित तार हटाउन नेपाल दूरसञ्चार प्राधिकरण र इन्टरनेट सेवा प्रदायक कम्पनीहरु राजी भएका छन् । तार हटाउन महानगरले प्रकाशित गरेको सूचनाका आधारमा प्राधिकरण र इन्टरनेट सेवाप्रदायक कम्पनीहरु भोलिदेखि बिजुलीका पोलमा बाँधिएका तारहरु हटाउन सहमत भएका हुन् । 

नेपाल दूरसञ्चार प्राधिकरण, नेट सेवा प्रदायक कम्पनीका प्रतिनिधिहरु र महानगरपालिका बीच आइतबार बैठक बसेको हो । बैठकमा सोमबारदेखि महानगर क्षेत्रका अव्यवस्थित तार हटाउन प्राधिकरण र इन्टरनेट सेवा प्रदायक कम्पनीहरु तयार भएको महानगरले जनाएको छ ।
सोमबार बिहान ८ बजेदेखि माइतीघर मण्डला र न्यूरोड क्षेत्रमा रहेका अव्यवस्थित तारहरु हटाइने छ ।

महानगरपालिकाले प्राधिकरण तथा इन्टरनेट सेवा प्रदायक कम्पनीहरुलाई १५ दिने म्याद दिंदै यही २७ वैशाखभित्र अव्यवस्थित तार हटाउन अल्टिमेटम दिएको थियो । 

शुक्रबार मात्र महानगरका प्रमुख बालेन साहले पोलमा तार गुजुल्टिएका तस्बीरहरु फेसबुक पेजमा पोष्ट गर्दै ‘गुजुल्टिएका तारहरु राखेर सुन्दर शहर प्राप्त हुँदैन भनेर स्टाटस लेखेका थिए । तोकिएको समयमा नहटाए महानगर आफैंले हटाउने चेतावनी समेत दिएका थिए ।
सञ्चार तथा सूचना प्रविधि मन्त्रालयले काठमाडौं महानगरपालिकासहित देशभरिका स्थानीय तहलाई सेवा अवरुद्ध हुनेगरी तार नहटाउन परिपत्र गरेपछि महानगरको पहलमा आज सम्बन्धित पक्षहरुको बैठक बसेको हो ।