सांसद तलब भत्ता खान मात्र बैठकमा आउँछनः सभामुख

२४ वैशाख, काठमाडौं । सभामुख देवराज घिमिरेले संसद बैठकमा सांसदहरु मासिक तलब भत्ता  लिन मात्र उपस्थित हुने गरेको बताएका छन् । उनले बैठकमा सांसदहरुको उपस्थिति कमजोर हुँदा प्रतिनिधिसभा प्रभावकारी हुन नसकेको बताए । बजेट अधिवेशन आइतबार सुरु हुनुपूर्व बसेको कार्यव्यवस्था परामर्श समितिको बैठकमा सभामुख घिमिरेले सांसदहरुको उपस्थितिबारे प्रश्न उठाएका हुन् ।

संसदमा माननीयहरूको उपस्थिति कमजोर भएपछि तलब भत्ता खान मात्र बैठकमा सांसदहरु आउँछन् भन्ने आम बुझाइ रहन गएको उनको भनाइ छ । उनले सबै सांसद बैठकमा नियमित र प्रभावकारी उपस्थितिका लागि ध्यानाकर्षण पनि गराएका छन् । 

प्रतिनिधिसभाको अघिल्लो अधिवेशनमा दुई वटा बैठकमा गणपूरक संख्या नपुगेर विधेयक अगाडि बढाउने प्रक्रिया रोकिएका थिए । यस्तो समस्या आउन नदिनेतर्फ सबै सचेत हुनुपर्ने सभामुख घिमिरेको भनाइ छ ।

यसैबीच सत्तारुढ दल नेपाली कांग्रेसका सांसद रामहरि खतिवडाले प्रतिनिधिसभाको बैठकमा निरन्तर उपस्थित हुने १० जना सांसदको नाम अधिवेशनको अन्तिममा सुनाउने प्रस्ताव गरेका छन् । अहिले अनुपस्थित हुने सांसदको नाम मात्रै प्रस्तुत हुने परम्परा छ । अब लगातार संसदमै बस्ने कमसेकम १० जना सांसदको नाम अधिवेशनको अन्त्यमा बोलेर प्रस्ताव आइतबार बसेको प्रतिनिधिसभाको कार्यव्यवस्था परामर्श समितिको बैठकमा राखेका हुन् । 

हाल संसद बैठकमा निरन्तर दश वटा बैठकमा अनुपस्थित हुने सांसदको नाम सुनाउने अभ्यास छ । संविधान र प्रतिनिधिसभा नियमावलीले समेत निरन्तर दश वटा बैठकमा अनुपस्थित रहने सांसदले सूचना दिनुपर्ने हुन्छ । अन्यथा बिना सूचना निरन्तर दश वटा बैठकमा अनुपस्थित भएको खण्डमा सांसद नै खारेज हुने सम्मको व्यवस्था छ ।

यसो हुँदा समेत सांसदहरुको संसद बैठकमा उपस्थिति कमजोर देखिएको भन्दै सांसद खतिवडाले निरन्तर उपस्थित हुने सांसदको नाम समेत सदनमै सुनाउने प्रस्ताव गरेका हुन् । यसो गर्दा संसद बैठकमा सांसदहरुको उपस्थिति बलियो हुन सक्ने उनको विश्वास छ ।