कानुनमन्त्री गुरुङद्वारा मिटरब्याजसम्बन्धी अध्यादेश सदनमा पेस

२४ वैशाख, काठमाडौं । अनुचित लेनदेन (मिटरब्याज) सम्बन्धी जाँचबुझ तथा अनुसन्धान अध्यादेश २०८०’ सदनमा पेस भएको छ । आइतबारदेखि सुरु भएको संघीय संसदको प्रतिनिधिसभा र राष्ट्रियसभाको संयुक्त बैठकमा कानून, न्याय तथा संसदीय मामिला मन्त्री धनराज गुरुङले पेस गरेका हुन् । 

यही वैशाख १५ मा हिउँदे अधिवेशन अन्त्य भएपछि सरकारको सिफारिसमा राष्ट्रपति राचन्द्र पौडेलद्वारा जारी अध्यादेशलाई दफावार छलफल र पारितका लागि पेस गरिएको हो ।

मिटरब्याज पीडितहरुले मिटरब्याजीमाथि तत्काल कारवाहीको मार्गै काठमाडौंमा धर्ना संघर्ष चर्काउँदै लगेपछि माग सम्बोधन गर्न र मिटरब्याजसम्बन्धी तथ्य संकलन तथा उजुरी लिन आयोग गठन गरी तत्काल काम सुरु गरी माग सम्बोधन गर्न संसद बन्द भएको अवस्थामा अध्यादेश ल्याइएको थियो । 

बैठकमा अर्थमन्त्री प्रकाशशरण महतले अर्थतन्त्रलाई उकास्नेबारे सरकारले लिएको बजेट नीति तथा योजनाबारे सदनलाई जानकारी दिइरहेका छन् । बैठक जारी छ ।