कांग्रेसका नेताहरुले गृहमन्त्री श्रेष्ठलाई भेटेर दिए बधाई

२७ वैशाख, काठमाडौं । नेपाली कांग्रेसका संस्थापन इतर समूहका नेताहरूले बुधबार उपप्रधान तथा गृहमन्त्री नारायणकाजी श्रेष्ठलाई भेटेर नक्कली शरणार्थी बनाएर ठगी गर्ने गिरोहसँग सम्लग्न रहेको आरोपमा दलका नेता र उच्च कर्मचारीलाई हिरातमा लिएर कारवाही सुरु गरेकोमा बधाइ दिएका छन् । 

नक्कली भुटानी शरणार्थी प्रकरणमा आफ्नै दलका नेता तथा पूर्वगृहमन्त्री बालकृष्ण खाँण पक्राउ परेकै दिन उनीहरू गएर गृहमन्त्री श्रेष्ठलाई भेटेर बधाइ दिएका हुन् । भेटपछि कांग्रेस नेता रञ्जित कर्ण  आफूहरुले गृहमन्त्रीलाई बधाई तथा शुभकामना र अनुसन्धानलाई अन्तिम रुप दिन पनि अनुरोध गरेको नेपालबहसलाई जानकारी दिए । आफूहरूले कुनै दबाब र प्रभावमा नपर्न पनि गृहमन्त्रीलाई आग्रह गरेको उनले बताए । 

जवाफमा गृहमन्त्री श्रेष्ठले आफूलाई कुनै पनि दबाब नआएको भन्दै दोषीलाई कारबाही गरिछाड्ने बचन दिएको थिए । गृहमन्त्री भेट्न कांग्रेस नेताहरू कर्णसहित गुरुराज घिमिरे, गोविन्द पोखरेल, भूपेन्द्रजंग शाही, मधु आचार्यलगायत पुगेका थिए ।