३३ जनाविरुद्ध मुद्दा, २७ करोड बिगो दावी

८ जेठ, काठमाडौं । नेपाल प्रहरीले नेपालीलाई नक्कली भुटानी शरणार्थी बनाएर ठगी गरेको अभियोगमा पक्राउ परेकाहरु ३३ जनाविरुद्ध मुद्दा चलाउनुपर्ने रायसहित साढे २७ करोड बराबरको बिगो कायम गरेको छ । १ सय १३ जनाले दिएको जाहेरीको आधारमा यो रकम बराबरको बिगो कायम हुने प्रहरीको अनुसन्धान प्रतिवेदनमा उल्लेख छ ।

यो अनुसन्धानका क्रममा तत्कालका लागि साढे २७ करोड बराबरको लेनदेनको हिसाबकिताब देखिएको हो । प्रहरीले सोमबार सरकारी वकिलको कार्यलायलाई बुझाएको प्रतिवेदनमा ३३ मध्ये १६ जनालाई प्रहरीले पक्राउ गरिसकेको र बाँकी १७ जना अहिले फरार रहेको उल्लेख छ । 

यसअघि सार्वजनिक पद धारण गरेकाहरुलाई भ्रष्टाचारको विषयमा छानबिनका लागि अख्तियार दुरुपयोग अनुसन्धान आयोगमा लेखी पठाउने राय पनि प्रहरीले दिएको छ । त्यस्तै, सार्वजनिक पद धारण गरेका बाहेकको हकमा भने अनुसन्धानका लागि सम्पत्ति शुद्धीकरण अनुसन्धान विभागलाई लेखी पठाउने राय पनि प्रहरीले दिएको छ ।