सबै कम्युनिस्ट पार्टीहरूबीचकाे एकतामा चीनको एक सूत्रीय जाेड

१२ जेठ, काठमाडौं । चीनको भ्रमणमा रहेका माओवादी केन्द्रका एवं पूर्वसभामुख अग्निप्रसाद सापकोटाको टोलीलाई चिनियाँ कम्युनिस्ट पार्टीका अन्तर्राष्ट्रिय विभाग मन्त्री लिउ जियान चाओले नेपालमा सबै कम्युनिस्टहरु एक हुन सुझाव दिएका छन् । 

नेपालमा अहिले कम्युनिष्ट पार्टी माओवादी केन्द्रको नेतृत्वमा सरकार भएपनि गैरकम्युनिष्ट दलहरु पनि सम्मिलित छन् । ठूलो वाम शक्ति नेकपा (एमाले) सरकार बाहिर छ । यस्तो अवस्थाबीच चीनले सरकारले नेतृत्व गरिरहेको पार्टीका पदाधिकारीसहितको टोलीलाई बोलाएर कम्युनिष्ट पार्टीहरुबीच एकताको एकल सूत्र दिएको हो ।

चीनको राजधानी बेइजिङमा माओवादी केन्द्रका नेताहरुसँगको भेटमा मन्त्री लिउले नेपालमा वामपन्थीहरु बीचको एकताले नै राजनीतिक स्थिरता कायम हुने बताएका हुन् । उनले नेपालमा वाम विचारधारा मिल्नेहरुबीच एकताको विकल्प नभएको बताए । मन्त्री लिउले नेपाली भ्रमण टोलीका नेता सापकोटासँग अलग्गै भेटवार्ता गरेका थिए । 

नेपाली टोलीमा माओवादी केन्द्रका सचिव डिलाराम आचार्य, नेताहरु हितमान शाक्य र गणेश साहलगायत छन् । टोलीलाई लिउले बिहीबार दिवाभोजको आयोजना गरेका थिए । चिनियाँ कम्युनिष्ट पार्टीको निमन्त्रणमा टोली यसै हप्ता बेइजिङ पुगेको हो ।