नक्कली भुटानी शरणार्थी प्रकरण गिरोहका नाइके केशव दुलालको घरजग्गा ‘कब्जा’

३० जेठ, काठमाडौं । नेपालीलाई नक्कली भूटानी शरणार्थी बनाइ अमेरिका उडाउने प्रलोभनमा पारी सयौं नेपालीसँग करोडौं रुपैयाँ ठगी प्रकरणमा गिरोहका नाइके झापाका केशव दुलालको ललितपुरस्थित घर र जग्गा विप्लव नेतृत्वको नेकपाले एक सार्वजनिक ‘सूचना’ टाँगेर ‘कब्जा’ गरेको छ । 

ललितपुरको हात्तीवनस्थित रहेको निर्माणाधीन घर र घर वरपरको जग्गा ‘कब्जा’ गरेको नेकपा ललितपुरले जनाएको छ । दुलाल प्रकरणमा ठगी, राज्यविरुद्ध अपराध, संगठित अपराध र लिखत कीर्ते गरी ४ मुद्दामा प्रहरी हिरासतमा छन् । उनीसहित ३० जनाविरुद्ध काठमाडौं जिल्ला अदालतमा मुद्दा चलिरहेको छ । अहिले थुनछेक बहस चलिरहेको छ । 

सर्वसाधारणलाई झुक्यानमा पारेर अपराधिक कार्य गरी थुपारिएको रकमबाट महंगो घरजग्गा जुटाएको भन्दै स्थानीयको सहभागितामा नेकपाका जिल्ला तहका नेता कार्यकर्ताहरुले ब्यानर र झण्डा टाँगेर सोमबार ‘कब्जा’ गरिएको हो । 

दुलालले ठगी, मानव तस्करी र राष्ट्रघात जस्तो अक्षम्य अपराध गरेर अपराधिक कार्यमार्फत लुटेको धनबाट निर्मित दुलालको यो घर जनताको आग्रह, अपिल एवम् सहभागितामा जन नियन्त्रणमा लिइएको ब्यानरमा उल्लेख छ । दुलाललाई अपराधीको संज्ञा दिँदै ‘अपराधिक’ व्यक्तिको कानुनी स्वामित्व सामाजिक रुपमा खारेज भइ सार्वजनिक स्वामित्व स्थापित भएको समेत जनाइएको छ । 

नेकपाले यसअघि पनि सुदखोर, अनुचित लेनदेन र झुक्यानमा पारी तमसुक गराई ‘साहु्’ले हडपेका जमिन, एमसीसीले लिएको जग्गा पनि देशका विभिन्न स्थानमा ‘कब्जा’ गरेको जनाउँदै आइरहेको छ ।

नेकपाले आफूलाइ वर्तमान संसदीय व्यवस्थाको सट्टा वैज्ञानिक समाजवादी व्यवस्था स्थापनाका लागि संघर्ष गरिरहेकाे दाबी गर्दै आइरहेको छ ।