कोकाहाको पानी धरान झरेपछि खुशीले रोए मेयर हर्क राई, बाजागाजासहित धरानबासीले गरे नाचगान

३०  जेठ, काठमाडौं । करिब ४० किलोमिटर पार गरेर कोकाहा खोलाको पानी धरान आइपुगेको छ । गत वैशाख १० मा स्थानीय निर्वाचनमा धरानवासीलाई पानी खुवाउने वाचा गरेका हर्कराज राईले निर्वाचन स्वतन्त्रबाट विजयी भएदेखि नै निरन्तर लागेको वर्ष दिनपछि पानी गएराति धरानमा झरेको छ । 

सुख्खायाममा चारदेखि ६ महिना काकाकुलको नियति भोग्दै आएका धरानबासीले खुशी मनाएका छन् । पानी आइपुगेपछि मेयर राई खुशीले भावविभोर हुँदै रोएका हुन् । 

कांग्रेस, एमाले र माओवादीबाट निर्वाचित वडाध्यक्षहरुसँग राम्रो सम्बन्ध कायम हुन नसकिरहेकै अवस्थाबीच उनले स्थानीयसहितकाे ९७ दिनकाे श्रमदानबाटै ४० किलोमिटर टाढा रहेको बराहक्षेत्र नगरपालिकास्थित कोकाहा खोलाको पानी  धरानमा झार्न सफल भएका हुन् । 

उनले निर्वाचनकाे मुख्य नारा नै खानेपानीलाइ बनाएका थिए । निर्वाचितपछि पटकपटक कार्यशैलीका कारण विवादमा तानिए पनि उनी खराे रूपमा प्रस्तुत हुँदै आएका छन् ।

पानी झरेपछि मंगलबार दिनभर धरानवासीले खुशीयालीमा नुहाउने, बाजागाजासहित नाचगान गरेका छन् ।