जर्मनीले नेपाली कामदार लैजाने, तलब-सुविधा जर्मनसरह हुने

३१ जेठ, काठमाडौं । जर्मनीले विभिन्न क्षेत्रमा नेपाली कामदार माग गरेको छ । मुख्यगरी उत्पादन क्षेत्रमा नेपालबाट कामदार लैजाने प्रस्ताव गरेको छ । 

सरकारले जर्मनीको प्रस्ताव स्वीकार गर्दै  श्रम, रोजगार तथा सामाजिक सुरक्षा मन्त्रालयले सम्झौता मस्यौदा तयारीको काम अगाडि बढाएको छ । 

मस्यौदा मन्त्रिपरिषदबाट पारित भएपछि दुई देशबीच सम्झौता हुने जनाइएको छ । जर्मनीबाट विभिन्न क्षेत्रका लागि नेपाली कामदार माग भइआएको र यसबारे आवश्यक प्रक्रिया अन्तिम चरणमा पुगेको श्रम मन्त्रालयका सह–सचिव राजिव पोखरेलले बताए । कामदार लगेर ट्रेनिङ दिने र लगत्तै काममा लगाउने गरी माग आएको उनले बताए । 

जर्मनले लैजाने नेपाली कामदारलाई जर्मन कामदार सरह तलब तथा सेवा–सुविधा उपलब्ध गराउनुपर्ने प्रस्ताव नेपालको तर्फबाट गरिएको छ । जर्मनी युरोपियन मुलुकभित्र विकसित राष्ट्रको सूचीमा पर्दछ ।