ब्लू ओसियन रिक्रुटमेन्टले आकर्षक प्रलोभनमा कुवेत पुर्याएका ११ नेपाली महिला श्रमिक अलपत्र

१ असार काठमाडाैं । आकर्षक तलबको लोभ देखाएर कुवेत पुर्याइएका ११ जना नेपाली महिला ३ महिनादेखि अलपत्र परेका छन् । काभ्रे, झापा, दाङ, मकवानपुरलगायत जिल्लाका उनीहरू अलपत्र अवस्थामा छन् । 
उनीहरु बत्तिसपुतलीमा रहेको म्यानवापर कम्पनी ब्लू ओसियन रिक्युटमेन्टमार्फत कुवेत पुगेका हुन् ।

सम्झौतापत्र उल्लेख भएभन्दा निकै कम तलबमा काम गर्न तयार नुहँदा आफूहरुलाई नेपाल झिकाउन अनुरोध गर्दा समेत ब्लू ओसियनले बेवास्ता गरेको उनीहरुको गुनासो छ ।

कुवेतका कम्पनीले घर फिर्ता पठाउन बेवास्ता गरेको उनीहरुले बताएका छन् । कुवेतका कम्पनीले घर फिर्ता आउन समेत नदिएको उनीहरुले बताए । मासिक ११० कुवेती दिनार तलबमा उनीहरू सम्झौता गरेर त्यहाँ पुगेका थिए । कुवेत पुगेपछि मासिक ५५ दिनार मात्र दिएपछि उनीहरु खर्च टार्न नसकेर अलपत्र परेका छन् । 

आफूहरु नेपाल जान बन्देज लागेको बताउँदै धम्की जबरजस्ती काममा लैजाने गरिएको उनीहरुको भनाइ छ । काममा जान नमान्दा कुटपिट समेत गर्ने गरिएको बताएका छन् ।

उनीहरुलाई साँघुरो कोठामा खान र सुत्न लगाइएको छ । उनीहरुमध्ये केहीको स्वास्थ्य समेत बिग्रिएको बताइन्छ । आफूहरुलाई चाँडो घर फर्काउन अनुरोध गरिएको भिडियो सार्वजनिक भएको छ ।

उनीहरु ११० केवेती दिनार तलब पाउने सम्झौतामा जनही १ लाख ८० हजार तिरेर कुवेत पुगेका बताए । काम गर्ने समय दैनिक ८ घण्टा तोकेर गएका उनीहरुलाई १२ घण्टासम्म काममा लगाइएको छ । उनीहरुलाई कुवेत पठाउने कम्पनी ब्लु ओसियन रिक्युटमेन्टका संचालकहरुले भने श्रमिक महिलालाई नै दोषी देखाएका छन् ।