एक्कासी हिलाम्मे मकैवारीमा ल्याण्ड भयो हेलिकप्टर !

१६ असार, अर्घाखाँची । झमझम पानी परिरहेको बेला एकाएक घर नजिकै मकैवारीमा हेलिकोप्टर ल्यान्ड हुँदा हजुरलाई कस्तो लाग्ला ? यस्तो परिस्थितिको सामना गरिरहेकाहरुलाई त सामान्य लाग्ला तर सामान्य मान्छेहरूको त यो अवस्थामा होस हवास नै उड्छ ।

ठ्याक्कै यस्तै भएको छ, अर्घाखाँची जिल्लाको भूमिकास्थान नगरपालिका वडा नं. ७ बरवासमा । असार १५ गते साँझ करिब पाँच बजे स्याला स्थित हिलाम्मे मकैवारीमा एकाएक हेलिकोप्टर अवतरण हुँदा स्थानीयबासीहरु आतंकित भए । कुनै जानकारी विना एकाएक हावा सरी आएको हेलिकोप्टर हिलाम्मे मकैवारीमा ल्यान्ड हुँदा केही वेर सन्नाटा छायो ।

मौसम खरावीका कारण रनभुल्लमा परेर मकैवारीमा केही बेरका लागि ल्यान्ड भएको हेलिकोप्टर मौसम सुधार हुनासाथ गन्तव्यमा पुगेको छ । डोल्पाबाट बिरामी लिएर पोखराका लागि उडेको हेलिकोप्टर शुक्रवार अबेर पोखरा पुगेको जनाइएको छ ।

खास के भएको थियो घटना ?

विरामी लिनको लागि पोखराबाट डोल्पाको लागि हिडेको हेली एभरेष्टको हेलिकोप्टर बिहान सन्धीखर्क टुँडिखेलमा आकस्मिक अवतरण गर्यो । बिहान करिब साढे दश बजेतिर टुँडिखेलमा अवतरण गरेको हेलिकोप्टर सन्धिखर्कमा करिब आधा घण्टा बिताएर गन्तव्यतर्फ प्रस्थान गर्यो ।

डोल्पा पुगेपनि मौसम खराबका कारण तत्काल विरामी बोकेर हिड्न नसकेको हेलिकोप्टर डोल्पाबाट पोखराको लागि उडान भरेकोमा मौसम खरावीका कारण बीचबीचमा रोकिँदै यात्रा अगाडि बढायो ।  जस अन्तरगत दिउँसो करिब ४ बजेतिर अर्घाखाँची भुमिकास्थान वडा न ७ श्याला स्थित मकैबारीमा आकस्मिक अवतरण गरेको थियो । मौसममा केही सुधार आएपछि त्यहाँबाट पुन उडान गरेको हेलिकोप्टर सकुशल पोखरा अवतरण गरेको सहि हेलिकोप्टरका क्याप्टेन सुमन पोख्रेलले फोन मार्फत जानकारी गराएका छन् ।