अबदेखि आयातित सामानमा पैठारीकर्ता र वितरकको पूर्ण विवरणसहितका ‘लेबल’ अनिवार्य

२२ असार, काठमाडौं । आगामी साउनदेखि उपभेक्तासम्म आइपुग्ने हरेक आयातित वस्तुमा आयातकर्ता र बजार वितरकको ‘लेबल’ अनिवार्य राख्नु पर्ने भएको छ । विभागले शुक्रबार एक सूचना जारी गर्दै लेबल अनिवार्य राख्नुपर्नेबारे ८ बुँदे निर्देशन जारी गरेको छ ।

आर्थिक ऐन २०८० को भन्सारसम्बन्धी अनुसूची १ को दफा १८ को उपदफा ४ ले यस्तो प्रावधान गरेको थियो ।  साेही प्रावधानलाई कार्यान्वयन गर्न भन्सार विभागले सम्पूर्ण पैठारीकर्ता र बजार वितरकलाई सूचित गरेको हाे ।

नेपाली बजारमा आउने उपभोगीय हरेक वस्तुको प्याकिङमा उत्पादन भएको मुलुक, कम्पनी र यसको वितरकको पूर्ण विवरण स्पष्ट उल्लेख गरी लेबल राख्नुपर्ने व्यवस्था गरिएको विभागले जनाएको छ । लेबलमा वस्तुको तौल, प्रकृति, आकार तथा नाम, ठेगाना, इमेल ठेगाना र वेवसाइट र एक्जिम कोड समावेश हुनुपर्ने व्यवस्था गरिएको छ । 

विवरणसहित लेबल नभएका वस्तु बजारमा बिक्री वितरण भएमा त्यस्ता वस्तु जफत हुने विभागले स्पष्ट पारेको छ । उद्योगको कच्चा पदार्थका रुपमा पैठारी हुने मालवस्तु, औद्योगिक मेसिनरी तथा उपकरण र निर्माण कार्यमा प्रयोग हुने संरचना जस्ता वस्तुमा भने लेबल आवश्यक नपर्ने विभागले जनाएको छ । 

तर उपभोक्तामा प्रत्यक्ष रुपमा बिक्री वितरण हुने सबै प्रकारका माल वस्तुमा लेबल सरकारले अनिवार्य गर्दै आइरहेको छ । लेबल अंग्रेजी वा नेपाली भाषामा हुनुपर्ने व्यवस्था गरिएको छ । सरकारले आगामी आवदेखि खाद्य वस्तुमा हुँदै आएको आयातलाई निरुत्साहित तुल्याउने नीति लिएको छ ।