बैंक तथा वित्तीय संस्थाहरूले अझै ब्याजदर घटाउनुपर्छः अर्थमन्त्री

२३ असार, काठमाडौं । अर्थमन्त्री डा. प्रकाशशरण महतले बैंक तथा वित्तीय संस्थाहरूले अझै ब्याजदर घटाउनुपर्ने बताएका छन् । बैंक तथा वित्तीय संस्थाहरूले चर्को ब्याजदर असुली गर्दा समस्या देखिएको भन्दै अर्थमन्त्री महतले अहिले कायम रहेको ब्याजदरमा परिवर्तन हुनुपर्ने बताए । 

पार्टी प्यालेस तथा क्याटरिङ व्यवसायी संघ, काठमाडौंले शनिबार आयोजना गरेको कार्यक्रममा बोल्दै उनले चर्को ब्याजदर घटाउनका लागि आफूले नेपाल राष्ट्र बैंकलाई भनेको र आगामी आर्थिक वर्षको मौद्रिक नीतिमा सो कुरा सम्बोधन भएर आउने विश्वास व्यक्त गरे । उनले अब आउने महिना ब्याजदर घटेर आउने बताए । 

उनले भने, ‘यो अहिलेको जुन ब्याजदर छ, त्यो ज्यादा छ । त्यसकारण यो पोलिसी रेट घटाउने र यो पुनर्ताजीकरण गर्नका लागि पनि त्यो सुविधा दिनुपर्छ भन्ने कुरा पनि मैले नेपाल राष्ट्र बैंकमा राखेको छु । सायद केही न केही सम्बोधन होला । ब्याजदर नघटाउँदै व्यवसाय सञ्चालनमा समस्या आउने उनको भनाइ छ । 

अर्थमन्त्री महतले सरकारले आन्तरिक उत्पादनलाई बढावा दिने नीति लिएको उल्लेख गर्दै आन्तरिक वस्तुहरूको खपतमा जोड दिन पनि आम उपभोक्तालाई आग्रह गरेका छन् । उनले सरकारको आगामी बजेटको उद्देश्य नै आन्तरिक उत्पादनलाई बढावा दिन रहेको बताए ।