कोशीका मुख्यमन्त्री थापाकाे नियुक्तिविरुद्ध परेको रिटको सुनुवाइ भएन

२४ असार, काठमाडौं । कोशी प्रदेशका मुख्यमन्त्री उद्धव थापाको नियुक्ति खारेजीको मागसहित एमालेका निवर्तमान मुख्यमन्त्री एमालेका हिक्मतकुमार कार्कीले शुक्रबार सर्वोच्च अदालतमा दायर गराएका रिट निवेदनमाथि आज सुनुवाइ हुन सकेन । 

रिट निवेदन सुनुवाइका लागि न्यायाधीश डा. आनन्दमोहन भट्टराईको एकल इजलासमा पेसी तोकिएको थियो । तर सर्वोच्च प्रशासनले उक्त रिट निवेदन  ‘हेर्न नभ्याइने’ सूचीमा  राखेको छ । 

थापा मुख्यमन्त्रीमा नियुक्ति हुँदा अपनाइएका प्रक्रिया असंवैधानिक रहेको दाबी गर्दै नियुक्ति खारेजीका लागि अन्तरिम आदेशको माग कार्कीले रिटमा गरेका छन् । उनले नवनियुक्त मुख्यमन्त्री थापा, प्रदेश प्रमुख पर्शुराम खापुङ र सभामुख बाबुराम गौतमलाई विपक्षी बनाएका छन् । उनले सभामुख बाबुराम गौतमले सरकार गठनका दाबी पेस निवेदनमा हस्ताक्षर गरेर संविधान मिचेको दाबी समेत गरेका छन् । 

उनले धारा १६८ को उपधारा ३ बमोजिम प्रदेशसभामा सबैभन्दा ठूलो दलको संसदीय दलको नेताको हैसियतमा आफूलाई मुख्यमन्त्री नियुक्तिको लागि उनले रिटमा परमादेश माग गरेका छन् ।

खापुङले थापालाई ९३ जना सदस्य रहेका प्रदेसभाको बहुमत ४७ संख्याको दाबीका आधारमा संविधानको धारा १६८ (२) बमोजिम थापालाई यही असार २१ गते मुख्यमन्त्री नियुक्त गरेका थिए । थापाले पद गोपनियताको शपथ समेत लिएर ६ सदस्यीय मन्त्रिमण्डल गठन गरिसकेका छन् । आजैमात्र माओवादी केन्द्र २ र कांग्रेसका एक प्रदेशसभा सदस्यलाई मन्त्रीमा नियुक्त गरेका छन् । माओवादी केन्द्रबाट प्रधानमन्त्री प्रचण्डका छोरी ज्वँई जीवन आचार्य आर्थिक मामिला तथा योजना मन्त्री बनेका छन् ।