एमालेमाथि लगाइएका संघिन आरोपहरु प्रधानमन्त्रीले फिर्ता लिएपछि संसद चल्छः अध्यक्ष ओली

२४ असार, काठमाडौं । नेकपा एमालेका अध्यक्ष केपी शर्मा ओलीले एमालेमाथि लगाइएका भ्रष्टाचार जन्य संघिन आरोपहरू प्रधानमन्त्रीले फिर्ता लिएपछि सदन चल्ने बताएका छन् । उनले प्रधानमन्त्रीकै कारण संसद नचलेको आरोप पनि लगाएका छन् । 

आइतबार संसद् भवन नयाँ बानेश्वरमा सञ्चारकर्मीसँग कुरा गर्दै ओलीले एमालेका कारण नभई प्रधानमन्त्रीका कारण संसद बन्द भएको बताए । ओलीले सदन सञ्चालन गर्न आफूहरू सकारात्मक भए पनि एमालेमाथि लगाइएको गम्भीर आरोपहरू फिर्ता नभएकाले संसद अवरोध भएको बताए । उनले  प्रधानमन्त्रीको जेठ २१ गतेको वक्तव्यप्रति गम्भीर आपत्ति रहेको पनि बताए ।

यसअघि आइतबार नै सिंहदरबारमा सदनको गतिरोध अन्त्य गर्ने विषयमा शीर्ष दलको बैठक बसेको थियो । यो बैठकमा एमालेका नेताहरूलाई भ्रष्टाचार प्रकरणमा नचलाउने सर्तमा ओली संसद अवरोध खोल्न राजी भएको भनिएको थियो । यस विषयमा भने उनले केही बताएनन् ।