राप्रपा नेपालले विस्थापित राजसंस्थाबारे धारणा परिवर्तन गर्ने, सुझाव समिति गठन

२४ असार, काठमाडौं । कमल थापा नेतृत्वको राप्रपा नेपालले विस्थापित राजसंस्थाबारे धारणा परिवर्तन गर्ने भएकाे छ । यसबारे आधिकारिक धारणा बनाउन सुझाव समिति गठन समेत गरेको छ ।

पार्टीको केन्द्रीय कार्य सम्पादन समितिको आज बसेको बैठकले राजसंस्था सम्बन्धी पार्टीको नीति पुनर्विचारसहित पार्टीको आधिकारिक धारणा तय गर्न उपाध्यक्ष प्राडा बिष्णुबहादुर भण्डारीको संयोजकत्वमा समिति गठन गरेको हो ।

समितिलाईँ सुझाव सहितको प्रतिवेदन पेश गर्न एक महिनाको समयअवधिसहित अधिकार दिइएको छ । समिति सदस्यमा केशवराज श्रेष्ठ, बसन्तमान सिंह अधिकारी, हिक्मत बहादुर ढकाल, प्रा. नरप्रसाद थापा, माधव खत्री, रामनरेश यादव, सुनिता कुरुम्बाङ र सदस्य सचिवमा राजाराम बर्तौला  ‘चुनेली’ रहेका छन् । समितिलाई एक महिनाभित्र प्रतिवेदन बुझाउन समय सिमा तोकिएको छ ।

यस्तै बैठकले सनातन धर्म संस्कृतिको रक्षा र प्रवर्द्धन गर्न निमित्त राष्ट्रिय सनातन धर्म संस्कृति परिषद् नेपाल गठन गर्ने निणर्य समेत गरेको छ । 

साथै बैठकले केन्द्रीय कार्य समितिको बैठक आगामी २०८० भदौको दोश्रो हप्ता काठमाडौंमा राख्ने निणर्य गरिएको प्रवक्ता बसन्तमान सिंह अधिकारीले जानकारी दिएका छन् ।