६० लाख पासपोर्ट छाप्न टेन्डरमा जाँदैछः परराष्ट्रमन्त्री

२५ असार, काठमाडौं । परराष्ट्रमन्त्री नारायणप्रकाश साउदले ६० लाख पासपोर्ट छपाइको निर्णय मन्त्रिपरिषदबाट भइसकेको बताएका छन् । उनले ५ वर्षका लागि ६० लाख  पासपोर्ट छपाइको निर्णय भएको जानकारी दिएका हुन् । 

प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समितिको सोमबारको बैठकमा मन्त्री साउदले पासपोर्ट खरिदको निर्णय टेन्डर प्रक्रियामा जान लागेको जानकारी दिए । उनले भने, ’पासपोर्ट जुनसुकै बेला पनि अभाव हुनसक्ने गर्न हुन्न भनेर लामो अवधिका लागि पासपोर्ट छपाइ गर्ने गरी मन्त्रिपरिषदले निर्णय गरेको छ ।’ 

उनले पाँच वर्षलाई पुग्ने गरेर लगभग ६० लाख पासपोर्ट छाप्ने निर्णय गरिएको भन्दै यो निर्णय अब टेन्डरको प्रक्रियामा जान लागेको जानकारी दिए । अहिले मौज्दात रहेका पासपोर्ट बाहेक थप ६० लाख प्रति पासपोर्ट छपाइको निर्णय हुन लागेको मन्त्री साउदले जानकारी दिएका हुन् ।