सीआईबीले नियन्त्रणमा लिने सूचना चुहिएपछि सारडा समूहका अध्यक्षसहित पाँच सदस्य फरार

२५ असार, विराटनगर । नेपाल प्रहरीको केन्द्रीय अनुसन्धान ब्यूरो सीआईबीले ललिता निवास जग्गा हिनामिना प्रकरणको फाइल खोलेर अनुसन्धान अगाडि बढाएपछि उद्योगी व्यवसायीमा तरंग फैलिएको छ । यस प्रकरणमा संलग्न व्यवसायीहरू पक्राउ पर्ने डरले धमाधम फरार हुन थालेका छन् । सस्तो मूल्यमा ललिता निवासले चर्चेको जग्गा खरिद गरेको सारडा समूहका अध्यक्ष शिवरतन सारडासहित पाँच जना यति बेला फरार भएका छन् । 

उनीहरू प्रहरीले नियन्त्रणमा लिने सूचना पाएपछि फरार भएका हुन् । काठमाडौँको बालुवाटार स्थित ललिता निवास जग्गा घोटाला प्रकरणमा उनीहरू पनि संलग्न भएको आरोप लागेको छ । सारडा समूह प्रतिष्ठित व्यापारी घराना हो । विराटनगरका व्यवसायीहरूका अनुसार सारडा समूहका पाँच सदस्य विगत असार १५ गतेदेखि सम्पर्कमा आएका छैनन् । 

सम्पर्कविहीन हुनेमा सारडा समूहका अध्यक्ष शिवरतन सारडा, राधेश्याम सारडा, श्रीनिवास सारडा, संविधानसभा सदस्यसमेत रहेका पवनकुमार सारडा र सारडा समूहका अध्यक्ष शिवरतन सारडाका छोरा सन्दिप सारडा फरार छन् । उनीहरूलाई ललिता निवास जग्गा हिनामिना प्रकरणको अनुसन्धानमा सोधपुछ गर्ने सीआईबीको तयारी थियो ।  

ललितानिवासको जग्गा दर्ता गर्नेमा मारवाडी सेवा समितिका अध्यक्ष कैलाशचन्द्र गोयल र उनका भाइ श्रवण गोयल पनि छन् । उनीहरू संचालक रहेको डिएलएफ डेभलपर्सले ललितानिवासको १८ रोपनी भन्दा बढी जग्गा दर्ता गरेको हो । कैलाशचन्द्र र श्रवण गोयलको साझेदारमा शिवरतन सारडा र सन्दीपकुमार सारडा छन् । हाल उनीहरु दुबई पुगेको बताइएको छ  ।

गोयल दाजुभाई बहुर्राष्ट्रिय कम्पनीका ट्रेडमार्क चोरीमा संलग्न हुने गरेको आरोप लाग्दै आएको छ । कैलाशचन्द्र गोयलको उत्थान कसरी भएको हो ? गुट्खा, खाने तेलदेखि अन्तर्राष्ट्रिय उत्पादनको ट्रेडमार्क उद्योग विभागमा पहिल्यै दर्ता गर्ने र उक्त कम्पनी नेपालमा लगानी गर्न आउँदा मुद्दा हालेर दुःख दिँदै अदालत सेटिङ गरी नेपालमा लगानी नै आउन नदिने मुख्य पात्रका रुपमा गोयल परिचित छन् । उनले चर्चित जापानीज पेन्ट कम्पनी कन्साई नेरोलिकलाई नेपालमा उत्पादन गर्न आएपछि मुद्दा हालेर त्यसै गरी दुःख दिएका छन् ।  

उनीहरूको नाममा ललिता निवासको जग्गा रहेपनि कति छ र कुन कुन कित्ता हो भन्ने यकिन भएको छैन । ३९७ जनाको लिष्टमा उनीहरुकाे पनि नाम समावेश छ । उनीहरूले कतिमा कति जग्गा किनेका थिए भन्ने कुरा जान्नका लागि पनि सीआइबीले सोधपुछ गर्ने तयारी गरेको हो । ललिता निवासको चार नम्बरपछिको जग्गा उनीहरूले किनेको बुझिएको छ । विराटनगरका उद्योगीहरुले पनि सम्पर्क गर्न खोज्दा उनीहरू भेटिएका छैनन् । 

स्थानीय उद्योगी भन्छन्, ‘उनीहरू जस्तो प्रतिष्ठित मान्छे भाग्नुपर्ने अवस्था सिर्जना भएपछि उद्योग व्यवसायीको क्षेत्रमा त्रास फैलिएको छ ।’ ललिता निवासको तेस्रो र चौथो नम्बरको जग्गा विवादित छ । सारडा परिवारको नेपालमा लामो इतिहास छ । ४० को दशकदेखि उनीहरू विराटनगर र काठमाडौं व्यापार र व्यवसाय चलाउँदै आएका छन् । 

नाेटःयस अघि सारडा समुहको यो समाचारमा शंकर समुहका लगानीकर्ताहरुको पनि फोटो असावधानीवस पर्न गएकोमा सो को भूलसुधार गरि सच्चाइएको छ । सम्पादक