बैंकिङ प्रणालीमा ४ खर्बभन्दा बढी लगानीयोग्य रकम जम्मा, रिपोमार्फत २० अर्ब खिच्दै राष्ट्र बैंक

२६ असार, काठमाडौं । नेपाल राष्ट्र बैंकले अधिक तरलता जम्मा भएको भन्दै २० अर्ब रूपैयाँ खिच्ने भएको छ । बैंकिङ प्रणालीमा लगानी योग्य रकम बढी भएकाले राष्ट्र बैंकले बजारबाट २० अर्ब रूपैयाँ खिच्ने भएको हो । राष्ट्र बैंकले रिभर्स रिपोमार्फत २० अर्ब रूपैयाँ बैंकिङ प्रणालीबाट खिच्न लागेको जनाएको छ । 

एक सूचना जारी गर्दै राष्ट्र बैंकले साउन ९ गतेसम्मका लागि १४ दिने अवधिको बोलकबोलमार्फत २० अर्ब खिच्न लागेको जनाएको छ । आर्थिक वर्षको अन्त्यमा सरकारी खर्च धेरै भएको र त्यो रकम बैंकमा आएपछि वित्तीय प्रणालीमा धेरै पैसा थुप्रिएको राष्ट्र बैंकको भनाइ छ । 

यही असारमा राष्ट्र बैंकले तीन पटक रिभर्स रिपोमार्फत बजारबाट रूपैयाँ बजारबाट झिकिसकेको छ । २०७९ माघ १२ गते ५ अर्ब रूपैयाँ तानेपछि असारमा मात्रै बैंकिङ प्रणालीबाट पैसा खिच्न थालेको हो । बैंकिङ प्रणालीमा हाल करिब ४ खर्बभन्दा बढी लगानीयोग्य रकम थुप्रिएको छ ।

बैंकिङ प्रणालीमा पैसा थुप्रिएपछि अन्तर बैंक दर, ट्रेजरी बिलको दर पनि घट्दै गएको छ । खासगरी अन्तर बैंक ब्याजदर साढे ५ प्रतिशतभन्दा तल झरेपछि राष्ट्र बैंकले रिभर्स रिपो जारी गर्न लागेको हो । सोमबारसम्म अन्तर बैंक ब्याजदर १.०९ प्रतिशत छ ।