बालुवाटारको ललितानिवासले चर्चेको सरकारी जग्गामा मैले बदमासी गरेको छैनः माधव नेपाल

२६ असार, काठमाडौं । नेकपा एकीकृत समाजवादीका अध्यक्ष माधवकुमार नेपालले बालुवाटारस्थित ललिता निवास र त्यसले चर्चेको सरकारी जग्गामा आफूले कुनै बदमासी नगरेको बताएका छन् । उनले  हिनामिना प्रकरणमा दोषी देखिएकालाई कारबाही हुनुपर्ने बताएका छन् । 

नेपाल पत्रकार महासंघ पाल्पा शाखाले मंगलबार तानसेनमा राखेको पत्रकार भेटघाटमा उनले ललिता निवास प्रकरणका दोषीलाई सरकारले नडराई कारबाही गर्नुपर्ने बताए । पूर्वप्रधानमन्त्रीसमेत रहेका अध्यक्ष नेपालको पनि संलग्नता भएको भन्दै उनीमाथि पनि अनुसन्धान गरी कारबाही हुनुपर्ने माग उठिरहेका बेला नेता नेपालले उक्त जग्गामा आफूले कुनै बदमासी नगरेको बताएका हुन् । 

सरकारी जग्गा हिनामिना प्रकरणमा जोसुकैले कसुर गरेको भएको पनि दण्ड पाउनुपर्छ भन्दै कारबाहीको भागिदार बनाइनुपर्ने बताए । नेपालले आफ्नो नाम पनि यस प्रकरणमा जोडिएको स्विकार्दै निर्णय गर्नेको नाम आउनु स्वाभाविक भएको बताए । नाम आउनेबित्तिकै आफूले बदमासी गरेको छैन भने आत्ति हाल्नुपर्ने अवस्था नहुने अध्यक्ष नेपालले बताए । उनले भने, ‘जुनसुकै तहका मान्छेले बदमासी गर्न सक्छन् । त्यसमा जोडिएको, संलग्न, हिस्सेदार छ वा छैन भन्ने कुरासँग पनि जोडिएको हुन्छ ।’

२०६६÷६७ मा पेस भएको फाइल प्रधानमन्त्री निवासलाई विस्तार गर्दै अगाडि बढाउने योजना राम्रो लागेकाले आफूले पनि काम अघि बढाउन निर्णय गरेको उनले बताए । सरकारी र अन्य प्रकारको जग्गा कानुनसम्मत तरिकाले छुट्याएर मात्र काम अघि बढाउनु भन्ने आफूले आफ्नो निर्णय गराउँदा लेखिएको ब्यहोरा जानकारी गराउँदै भन, यससँग जोडिएका, गिरोहका रुपमा रहेकालाई छाड्नुपर्ने अवस्था छैन ।’ 

यो वा त्यो प्रकरण नभई देशव्यापी सरकारी जग्गामा भएको हिनामिनाको छानबिन गर्नसमेत वर्तमान प्रधानमन्त्री पुष्पकमल दाहाललाई आफूले आग्रह गरिसकेको बताए । ‘नेपाल ट्रस्टको जग्गादेखि लिएर सरकारी जग्गाको हिनामिना भएको देखिएको छ, यस्ता सबै जग्गाको छानबिन भएर कारबाही भयो भने बल्ल मान्छे डराउने अवस्था आउनेछ, उनले भने ।